Belgııa tarıhyndaǵy eń iri orman órti myńdaǵan gektardy sharpydy
ASTANA. KAZINFORM — Belgııada Joǵary Fenn (Hohes Venn) tabıǵı qoryǵynda bolǵan aýqymdy orman órtimen kúres jalǵasyp jatyr. Órt saldarynan júzdegen turǵyn úıin tastap ketýge májbúr boldy, dep habarlaıdy Kazinform agenttigi DW-ge silteme jasap.
Belgııamen shekaraǵa jaqyn ornalasqan Soltústik Reın-Vestfalııadaǵy Monshaý qalasynda Belgııanyń Joǵary Fenn tabıǵı qoryǵyndaǵy aýqymdy orman órti odan ári taralyp, jaǵdaıdyń nasharlaý qaýpi bar. Órt oshaǵy Germanııa shekarasynan shamamen 3 shaqyrym jerde ornalasqanyn qala ákimshiligi 16 tamyz, jeksenbige qaraǵan túni habarlady. Úsh aýdannyń turǵyndaryna «aıtarlyqtaı» tútin shyǵý qaýpine baılanysty bul aýmaqtardan ketýge «qatań túrde» eskertý jasaldy.
Órttiń odan ári órshýine baılanysty tútinniń qoıýlanyp, aýaǵa kúldiń taralý qaýpi bar. Osyǵan baılanysty Messevegtiń batysynda ornalasqan Plattevenn, Leıloh jáne Kalterherberg aýdandarynyń turǵyndaryna densaýlyǵyna tónetin qaýipke baılanysty tańerteńge deıin bul aýmaqtardy tastap, týystarynyń nemese dostarynyń úıine barýǵa keńes berildi. Evakýatsııalanǵan turǵyndardy ýaqytsha ornalastyrý úshin arnaıy pýnkt te ashylady.
Monshaý órt sóndirý qyzmeti tolyq daıyndyq rejımine kóshti. Qala ákimshiliginiń málimetinshe, órt Germanııa aýmaǵyna ótken jaǵdaıda ony dereý sóndirýge kirisý úshin aldyn ala órt sóndirý sharalary ázirlenip jatyr.
Belgııa jaǵyndaǵy evakýatsııa
Belgııa bıligi Kalterherbergtiń dál batysynda ornalasqan Kıýhelshaıd eldi mekenin evakýatsııalaý týraly sheshim qabyldady.
Germanııa shekarasyna jaqyn Joǵary Fenn aýmaǵyndaǵy orman órti Belgııa tarıhyndaǵy eń alapat órtke aınaldy. Órt 14 tamyz, juma kúni tústen keıin bastalyp, sodan beri tez taralǵan. Bıliktiń málimetinshe, jalyn qazirdiń ózinde 3 myń gektardan astam aýmaqty kúlge aınaldyrǵan.
Belgııanyń Belga aqparat agenttiginiń habarlaýynsha, Sýrbrod pen Bıýtgenbah eldi mekenderiniń shamamen 600 turǵynyna evakýatsııa týraly eskertý jasalǵan.
Belgııa EO-dan kómek surady
Belgııa orman órtimen kúreske Eýropalyq Odaqtan kómek tartý úshin azamattyq qorǵaýdyń eýropalyq tetigin iske qosty. Qazirgi ýaqytta órtti sóndirý jumystaryna Nıderlandtan kelgen órt sóndirý tikushaǵy qatysyp jatyr. Jeksenbi kúninen bastap órt sóndirýge taǵy eki tikushaq pen Shvetsııanyń eki órt sóndirý ushaǵy qosylady dep josparlanyp otyr.
Al Germanııanyń Eıfel aımaǵyndaǵy Hıýrtgenvaldta ahýal jaqsarǵan. Eldi mekenderdiń birinen turǵyndar evakýatsııalanǵan edi. Qazir shamamen 1 800 adam úıine oraldy.
Germanııada osy jazdaǵy eń iri órt
Bul — jaz bastalǵaly beri Germanııadaǵy eń iri ári saldary eń aýyr orman órti. Soltústik Reın-Vestfalııa ishki ister mınıstri Herbert Roıl (Herbert Reul) órttiń shyǵýyna adam qateligi sebep bolýy múmkin ekenin aıtty.
Kelnniń ońtústik-batysynda ornalasqan Dıýren mańyndaǵy Hıýrtgenvaldta orman órti 13 tamyzda bastaldy. Alǵashynda ekpindi jeldiń áserinen órt tez taraldy. 15 tamyzǵa qaraǵan túni órttiń taralýyn toqtatýǵa múmkindik týdy.
Germanııanyń barlyq aýmaǵynda aptap ystyq pen qurǵaq aýa raıyna baılanysty birneshe kúnnen beri kóptegen orman jáne dala órtterimen kúres júrip jatyr. Qazir eldiń basym bóliginde aýa temperatýrasy 30 gradýstan joǵary.
Eske salaıyq, buǵan deıin Frantsııada shilde aıynyń basynan beri el aýmaǵynda bolǵan orman órtterine qatysy bar degen kúdikpen 474 adam ustalǵanyn jazǵanbyz. Olardyń 183-i kámeletke tolmaǵan.
