Belgııa Ormýz buǵazyn ashýǵa, sonyń ishinde mınasyzdandyrý arqyly úles qosýǵa daıyn

ASTANA. KAZINFORM – 2 sáýir kúni Ulybrıtanııanyń bastamasymen Ormýz buǵazy arqyly keme qatynasyna múddeli elderdiń syrtqy ister mınıstrleriniń beınekonferentsııasy ótti, dep habarlaıdy Kazinform agenttiginiń Eýropalyq odaqtaǵy menshikti tilshisi.

Kezdesýdi Ulybrıtanııa syrtqy ister mınıstrliginiń basshysy Ivett Kýper uıymdastyryp, júrgizdi. Kelissózderge ártúrli qurlyqtardan 40-tan astam eldiń ókilderi qatysty. Qatysýshylar strategııalyq mańyzy zor buǵazdaǵy keme qatynasy erkindigin qorǵaý jáne ony múmkindiginshe tezirek ashý úshin halyqaralyq deńgeıde úılestirilgen jaýap qajet ekenin rastap, ortaq ustanymdaryn bildirdi.

Beınekonferentsııaǵa qatysqan Belgııanyń syrtqy ister mınıstri Maksım Prevo eli qaýipsiz keme qatynasyn qamtamasyz etýge, sonyń ishinde mınasyzdandyrý salasyndaǵy tájirıbesin paıdalaný arqyly úles qosýǵa daıyn ekenin málimdedi.

Ol buǵazdyń odan ári jabyq bolýy Eýropa úshin de, ásirese damýshy elder úshin de aýyr ekonomıkalyq saldarǵa alyp keletinin atap ótti.

Jalpy, beınekonferentsııa barysynda turaqty bitimge qol jetkizilgennen keıin Ormýz buǵazynyń qalypty jumysyn qaıta jandandyrýǵa baǵyttalǵan saıası, dıplomatııalyq jáne ekonomıkalyq sharalar talqylandy.

Óz kezeginde Irak Ormýz buǵazyn aınalyp ótip, Sırııa arqyly munaı eksportyn bastady. Baǵdad álemdik energetıkadaǵy negizgi baǵyttardyń birindegi irkilisterge baılanysty jetkizý baǵyttaryn qaıta baǵdarlap jatyr.

Buǵan deıin Irak Ormýz buǵazynyń jabylýyna baılanysty eń iri munaı ken oryndarynyń jumysyn toqtatqanyn habarlaǵan. Keıinirek el bıligi munaı ken oryndary boıynsha fors-major jarııalady.