Belgııa mıgranttar úshin otbasylardy biriktirý erejelerin qatańdatty

ASTANA. KAZINFORM — Belgııa parlamentiniń músheleri otbasylardy biriktirýdi shekteıtin úkimettik zań jobasyn qabyldady. Bul shema elde zańdy túrde turatyn shetel azamattaryna bir nemese birneshe otbasy múshelerin ákelýge múmkindik beredi, dep habarlaıdy Euronews. 

Jańa erejege sáıkes, bosqyndarǵa ótinish berý úshin nebári alty aı ýaqyt beriledi. Qosymsha qorǵaý alýshylar, ıaǵnı bosqyn mártebesi joq adamdarǵa eki jyl kútýge týra keledi. 

Jańa zań da qomaqty qarjy resýrstaryn qajet etedi. Ótinim berý úshin talap etiletin qajetti eń tómengi kiris ulǵaıtyldy: buryn 2100 eýromen salystyrǵanda qazir shamamen 2300 eýro tabý kerek. Bul soma árbir qosymsha otbasy múshesi úshin 10%-ǵa artady.

— Eger bireý serigi men eki balasyn ákelgisi kelse, ol aıyna 2700 eýro taza tabys tabýy tıis. Bul óte qomaqty soma, tipti Belgııadaǵy ortasha jumysshy osynsha kóp jalaqy almaıdy dep aıtar edim, — dep túsindirdi Brıýsseldegi Vluchtelingenwerk Vlaanderen úkimettik emes uıymynyń saıasat jónindegi dırektory Tomas Vıllekens.  

Belgııanyń baspana jáne kóshi-qon isteri jónindegi mınıstri Annelın Van Bossýıýt bul sharalardy qorǵaıdy. Joba avtorynyń pikirinshe, «adamdardyń aǵylýyn azaıtý kerek. Bizdiń qoǵam endi bul aýyrtpalyqty kótere almaıdy». 

Atap ótilgendeı, úkimet otbasylardy biriktirý arqyly keletin mıgranttar sanyn azaıtqysy keledi. Sheteldikterdiń isteri jónindegi basqarmanyń málimetinshe, ótken jyly EO-ǵa kirmeıtin 20 724 azamat osy shema boıynsha Belgııaǵa vıza alǵan.

Belgııa bıligi sondaı-aq azamattyq quqyq berýge ótinish berý tólemin arttyrý sheshimim qabyldady. Ol 150-den 1000 eýroǵa deıin kóteriledi.

Buǵan deıin AQSh-qa zańsyz barǵan mıgranttar kepildikpen bosatylý múmkindigin paıdalana almaıtynyn jazǵan edik.