Belgııa koroli men patshaıymy Qazaqstanǵa keledi: Sapardyń kún tártibi qandaı
ASTANA. KAZINFORM – 12-14 qazanda Belgııa koroli Fılıpp pen koroleva Matıldanyń Qazaqstanǵa memlekettik sapary ótedi. Bul Belgııa monarhtarynyń Ortalyq Azııaǵa jasaıtyn alǵashqy memlekettik sapary bolmaq. Osyǵan oraı, Koroldiktiń Astanadaǵy elshiligi alǵashqy memlekettik sapardyń qalaı ótetinin, qandaı taqyryptardy talqylaıtynyn túsindirdi.
Korol Fılıpp taq murageri kezinde Qazaqstanǵa úsh ret kelgen. 2002 jáne 2009 jyldary ol belgııalyq ǵaryshker qatysqan ǵarysh mıssııalarynyń ushyrylymyn kórý úshin Baıqońyrǵa barǵan. Al 2010 jyly Qazaqstanǵa kelgen ekonomıkalyq delegatsııany basqarǵan. 2021 jyly Belgııaǵa barǵan Qazaqstan Prezıdenti Qasym-Jomart Toqaevpen kezdesken.
Belgııa elshiliginiń málimdeýinshe, sapar baǵdarlamasy tórt negizgi baǵytty qamtıdy. Olar – asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Sondaı-aq Belgııadan Qazaqstanǵa 110 adamnan turatyn delegatsııa keledi. Onyń quramynda tórt mınıstr, 25 kompanııa basshysy, 10 ýnıversıtet rektory jáne 13 jýrnalıst bar. Delegatsııa quramynyń aýqymdy bolýy Belgııa tarapynyń aldaǵy saparǵa joǵary qyzyǵýshylyq tanytyp otyrǵanyn kórsetedi.
Belgııanyń federaldyq úkimetiniń atynan Kólik mınıstri Jan-Lıýk Krıýke qatysady. Ol kólik qatynasy, klımat jáne ekologııalyq transformatsııa máselelerine jaýap beredi. Odan bólek, Brıýssel astanalyq óńiriniń mınıstr-prezıdenti Borıs Dıles, Vallonııa óńiriniń mınıstr-prezıdenti Adrıen Dolımon jáne Flandrııa úkimetiniń mınıstri Sılte Van Ahter de bar.
Belgııa koroli men korolevasy Astana men Almatyda qaıda barady
Belgııa monarhtarynyń memlekettik sapary Aqordada ótetin resmı qarsy alý rásiminen bastalady. Odan keıin Qazaqstan Prezıdenti Qasym-Jomart Toqaevpen shaǵyn jáne keńeıtilgen quramda kelissózder júrgizedi.
Budan soń korol men koroleva Astana men Almatydaǵy mádenıet jáne ǵylym nysandaryn aralap, eki el arasyndaǵy yntymaqtastyqqa arnalǵan kezdesýlerge qatysady.
Sapar baǵdarlamasyndaǵy mańyzdy nysandardyń biri – Astanadaǵy Ulttyq balalardy ońaltý ortalyǵy. Onda taraptar densaýlyq saqtaý salasyndaǵy yntymaqtastyq múmkindikterin talqylaıdy.
Qazaqstannyń Ulttyq mýzeıinde qonaqtarǵa belgııalyq áıgili sýretshi Djeıms Ensordyń kórmesi usynylady.
Al Nazarbaev ýnıversıtetinde – asa mańyzdy paıdaly qazbalar salasyndaǵy Qazaqstan men Belgııa yntymaqtastyǵyna arnalǵan dóńgelek ústel ótedi. Sondaı-aq Qazaqstan-Belgııa iskerlik keńesiniń tórtinshi otyrysy uıymdastyrylady.
Alem.AI ortalyǵynda – Belgııa koroli men korolevasy Sıngýlıarlyq mýzeı men TUMO mektebin aralaıdy. Munda Qazaqstan men Belgııa ýnıversıtetteri rektorlarynyń forýmy da ótedi. Onda jasandy ıntellektini ǵylym men bilim berý salasynda qoldaný máseleleri talqylanady.
Memlekettik sapar aıasynda koroldik jup Almatyǵa da barady. Qaladaǵy sapar baǵdarlamasyna ıAdrolyq fızıka ınstıtýtyna barý engizilgen. Onda taraptar ıadrolyq medıtsına salasyndaǵy yntymaqtastyq múmkindikterin qarastyrady.
Sonymen birge, korol men koroleva Almaty Museum of Arts óner mýzeıin aralaıdy.
Qazaqstan men Belgııa saýdasy
Qazaqstan Belgııaǵa negizinen ósimdik tektes ónimder, sonyń ishinde zyǵyr tuqymyn eksporttaıdy. 2025 jyly zyǵyr tuqymy eksportymyzdyń jartysyna jýyǵyn quraǵan. Onyń quny 74,6 mln eýroǵa jetip, jalpy eksporttyń 46,2%-yn alady. Ekinshi orynda mıneraldyq ónimder – 61,1 mln eýro (37,9%), úshinshi orynda baǵaly emes metaldar – 14,2 mln eýro (8,8%).
Budan bólek, Qazaqstan Belgııaǵa hımııa ónerkásibi ónimderin, toqyma buıymdaryn jáne basqa da taýarlardy jetkizgen. Bul derekter Belgııanyń Syrtqy saýda agenttiginiń málimetterinde keltirilgen.
Al Qazaqstan Belgııadan negizinen hımııa jáne farmatsevtıka ónimderin, ásirese dári-dármek pen vaktsınalardy satyp alady. 2025 jyly bul taýarlar ımportymyzdyń 48,4%-yn qurap, jalpy quny 292,5 mln eýro boldy.
Sondaı-aq Qazaqstan Belgııadan ónerkásiptik jabdyqtar men tehnıka bólshekterin (92,2 mln eýro nemese 15,3%), kólik quraldaryn, sonyń ishinde júk tartqyshtary men jeńil avtomobılderdi (77,1 mln eýro nemese 12,8%) ımporttaǵan.
Eki el arasyndaǵy saýda kólemi ósip keledi. 2026 jyldyń alǵashqy úsh aıynda Qazaqstannyń Belgııaǵa eksporty 12,3%-ǵa ósip, 44,7 mln eýroǵa jetti. Al Belgııanyń Qazaqstanǵa eksporty 9,2%-ǵa artyp, 147,4 mln eýrony qurady.
Eske sala ketsek, maýsym aıynda Prezıdent Qasym-Jomart Toqaev Belgııa koroldigine resmı saparmen bardy.
Sol kezde Qazaqstan men Eýropalyq Odaq qandaı qujattarǵa qol qoıdy.
