Belgııa Koroli Fılıpp pen Patshaıym Matıldanyń Qazaqstanǵa sapary Brıýsselde talqylandy
ASTANA. KAZINFORM — Búgin Brussels Press Club alańynda Belgııa Koroli Fılıpp pen Koroleva Matıldanyń Qazaqstanǵa alǵashqy memlekettik saparynyń qorytyndylary, sondaı-aq Qazaqstan men Belgııa jáne Eýropa odaǵy arasyndaǵy yntymaqtastyqty damytý máseleleri talqylanǵan brıfıng ótti, dep habarlaıdy Kazinform agenttiginiń Belgııadaǵy menshikti tilshisi.
Jıyndy Buscardini Communications kompanııasy Qazaqstan Respýblıkasynyń Elshiligimen birlesip uıymdastyrdy. Brıfıng Respýblıka kúni qarsańynda ótip, eki el arasyndaǵy dıplomatııalyq qarym-qatynas ornaǵanyna 35 jyl tolýyna oraı ótkizildi.
Brıfıngte sapar qorytyndysy, ýaǵdalastyqtardy iske asyrý jáne Eýropa odaǵynyń Ortalyq Azııamen baılanysyndaǵy Qazaqstannyń róli talqylandy. Sondaı-aq Qazaqstan men Eýropa odaǵy arasyndaǵy yntymaqtastyqty nyǵaıtý máselesi qaraldy.
Brıýssel baspasóz klýbynyń prezıdenti Antonıý Býskardınıdiń Kazinform agenttiginiń Brıýsseldegi menshikti tilshisine aıtýynsha, jıyn Belgııa Koroliniń saparyn Belgııa men Eýropa odaǵynda keńinen talqylaý maqsatynda uıymdastyrylǵan.
– Biz Qazaqstan men Belgııa arasyndaǵy qarym-qatynasqa basymdyq berip, Eýropa odaǵymen yntymaqtastyqqa da nazar aýdarǵymyz keledi. Búgin Eýropa odaǵy Keńesi tóraǵasy Antonıý Koshtanyń keńsesinen kelgen spıker Qazaqstan men Eýropa odaǵy arasyndaǵy yntymaqtastyqqa jan-jaqty sholý jasady, – dedi Antonıý Býskardını.
Buǵan deıin EO kóshbasshylary Brıýsselde mańyzdy máselelerdi talqylaǵanyn habarlaǵan bolatynbyz.
