Belgııa Qazaqstannyń senimdi seriktesi bolýǵa daıyn — Maksım Prevo
ASTANA. KAZINFORM — Brıýsselde Qazaqstan Syrtqy ister mınıstri Muhtar Tileýberdi Belgııa Koroldigi Premer-mınıstriniń orynbasary, syrtqy ister, Eýropa isteri jáne damý salasyndaǵy yntymaqtastyq mınıstri Maksım Prevomen kezdesti, dep habarlaıdy Kazinform agenttiginiń menshikti tilshisi.
Kezdesý Eýropalyq odaq, Qara teńiz aımaǵy, Ońtústik Kavkaz jáne Ortalyq Azııa arasyndaǵy óńiraralyq ózara baılanys jónindegi ekinshi mınıstrlik kezdesýden keıin ótti.
Belgııa mınıstri óziniń málimdemesinde bul eki el ókilderiniń alǵashqy kezdesýi bolǵanyn atap ótti. Taraptar bıyl qazanda Korol Fılıpp pen Patshaıym Matıldanyń Qazaqstanǵa jasaǵan memlekettik saparynyń qorytyndylaryna, sondaı-aq eki eldiń syrtqy ister vedomstvolary arasynda 2027–2029 jyldarǵa arnalǵan yntymaqtastyq jol kartasynyń jaqynda qabyldanýyna súıene otyryp, ekijaqty baılanysty odan ári nyǵaıtýǵa nıetti ekenin rastady.
— Belgııa ortaq maqsattarymyzdy naqty nátıjege aınaldyrý úshin Qazaqstannyń senimdi seriktesi bolýǵa daıyn, — dedi Maksım Prevo.
Ol yntymaqtastyqtyń bolashaǵy zor birneshe baǵytyn atap ótti. Sonyń biri — asa mańyzdy shıkizat salasy. Bul baǵytta Qazaqstannyń tabıǵı resýrstyq áleýeti Belgııanyń shıkizatty óńdeý jáne qaıta óńdeý tájirıbesimen ushtasady.
Sondaı-aq mınıstr strategııalyq mańyzy bar Transkaspıı halyqaralyq kólik baǵytyna (Orta dáliz) erekshe toqtaldy. Onyń aıtýynsha, bul baǵyt bıznes úshin jańa múmkindikter ashyp, jetkizý tizbegin ártaraptandyrýǵa jol beredi.
Mınıstrler 2027 jyly atap ótiletin eki el arasyndaǵy dıplomatııalyq qatynastardyń ornaǵanyna 35 jyl tolýyna daıyndyq máselesin de talqylady. Maksım Prevo kelesi jyly Qazaqstanǵa jáne tutastaı Ortalyq Azııa óńirine saparlap, ekijaqty baılanysty odan ári nyǵaıtýdy josparlap otyrǵanyn málimdedi.
Aıta keteıik, 2027–2029 jyldarǵa arnalǵan jol kartasy saıası dıalogty jandandyrýdy, turaqty konsýltatsııalar ótkizýdi, vedomstvoaralyq baılanystardy nyǵaıtýdy jáne birlesken bastamalardy ilgeriletýdi kózdeıdi.
Qazan aıynda koroldik juptyń Qazaqstanǵa jasaǵan memlekettik sapary kezinde taraptar asa mańyzdy shıkizat, kólik jáne logıstıka máselelerine basa nazar aýdardy. Sondaı-aq birqatar kommertsııalyq jáne ǵylymı-bilim berý kelisimderine qol qoıyldy.
Muhtar Tileýberdi Brıýsselge jumys sapary aıasynda Eýropanyń birqatar eliniń ókilderimen ekijaqty kezdesýler ótkizip, belgııalyq bıznes ókilderimen de kelissóz júrgizdi. Atap aıtqanda, Sarens Group, Ahlers Logistics jáne basqa kompanııalarmen logıstıkaǵa ınvestıtsııa salý jáne Orta dálizdi tsıfrlandyrý máseleleri talqylandy.