Belgııa - Qazaqstan: matchtyń ýaqyty belgili boldy

ASTANA. KAZINFORM — 7 qyrkúıekten 8 qyrkúıekke qaraǵan túni Brıýsselde (Belgııa) fýtboldan 2026 jylǵy álem chempıonatynyń irikteý kezeńi aıasyndaǵy Belgııa — Qazaqstan matchy ótedi, dep habarlaıdy Sports.kz.

Kezdesý tikeleı efırde Qazsport telearnasynan kórsetiledi. Translıatsııa Astana ýaqytymen 23:45-te bastalady.

Qarsylas komandalardyń jaǵdaıyna toqtalsaq, Belgııa quramasy úsh oıynnan jeti upaı jınap otyr. Qazaqstan quramasynyń qorjynynda tórt oıynnan úsh upaı bar.

Belgııa sońǵy matchynda syrt alańda Lıhtenshteındi 6:0 esebimen oısyrata jeńdi. Gol avtorlary: Maksım De Keıper (29-mınýt), ıÝrı Tılemans (46, 70-mınýt, penaltı), Artıýr Teate (60-mınýt), Kevın De Brıýıne (62-mınýt) jáne Malık Fofana (90+1-mınýt).

Qazaqstan quramasy Ýelske qarsy sońǵy oıynda 0:1 esebimen jeńilip qaldy. Vallıılik Kıffer Mýr 25-mınýtta jalǵyz goldy soqqan edi.

Eske sala keteıik, Qazaqstan quramasy match aldynda Belgııaǵa kelip, daıyndyqtaryn jalǵastyryp jatyr.