Belgııa esirtkige qarsy komıssary: elektrondy temekiler balalardy táýeldilikke ákeledi
ASTANA. KAZINFORM — Belgııada tárkilengen zańsyz elektrondy temeki suıyqtyqtarynyń basym bóliginen óte kúshti, aýyrsynýdy basatyn sıntetıkalyq dáriler anyqtaldy. Bul balalardyń erte jastan qaýipti táýeldilikke túsýine sebep bolýy múmkin, dep habarlaıdy Euronews.
Eldiń esirtkimen kúres jónindegi komıssary Ine Van Vımersh jasóspirimderdiń elektrondy temekige áýestenýiniń kóleńkeli tusy bar ekenin aıtty. Onyń sózinshe, zańsyz ónimderge astyrtyn túrde aralastyrylatyn dáriler (táýeldilik týdyratyn, aýyrsynýdy basatyn hımııalyq zattar) balanyń aǵzasyn baıqatpaı táýeldi etýi múmkin.
«Men zańsyz elektrondy temekilerge qatty alańdaımyn. Belgııada tárkilengen zańsyz suıyqtyqtardyń 80 paıyzdan astamynda jasandy aýyrsynýdy basatyn, táýeldilik týdyratyn qospalar boldy. Olardyń ıisi de, túsi de bilinbeıdi», - dedi Van Vımersh.
Ol mundaı jasyryn qospalar balanyń júıke júıesiniń qalypty damýyna zııanyn tıgizip, erte jasta táýeldilikke alyp keletinin atap ótti.
«Bul — óte úlken qater. Biz osy arnalardyń jolyn kesý arqyly balalardy qorǵaýymyz kerek», - dedi ol.
Belgııa men Nıderlandyda osyndaı sıntetıkalyq esirtkilerdi daıyndaıtyn qupııa zerthanalar kóp. Olarǵa qajetti hımııalyq zattar Qytaı men Úndistannan jetkiziledi.
Komıssardyń aıtýynsha, qylmystyq toptar balalardy qyzyqtyrý úshin ónimderdi jemis, kámpıt dámimen shyǵarady. Osyǵan baılanysty Belgııanyń densaýlyq saqtaý mınıstri ónimderdegi barlyq hosh ıisti qospalarǵa tolyq tyıym salýdy qarastyryp jatyr.
Eger bul usynys qabyldansa, Belgııa Eýropadaǵy eń qatań elektrondy temeki retteý erejelerin engizgen elderdiń qataryna qosylady.
Van Vımersh qylmystyq toptardyń, ásirese osal jaǵdaıdaǵy jasóspirimderdi, ata-anasyz júrgen kámeletke tolmaǵan mıgranttardy ózderine tartyp jatqanyn aıtty.
«Brıýsselde kóptegen jasóspirimder stýdentterge arnalǵan jumys taba almaı júr. Eger biz olarǵa bilim men múmkindik bermesek, qylmystyq uıymdar óz jolyn usynady», - dedi ol.
Komıssar qylmystyq toptardyń port jumysshylaryn, polıtsııa qyzmetkerlerin, tipti zańgerlerdi de aqsha arqyly satyp alýǵa tyrysatynyn aıtty.
«Biz esirtki memleketi emespiz, biraq oǵan jol bermes úshin dereý áreket etýimiz kerek», - dedi Van Vımersh.
Ol qylmystyq uıymdardyń basty kúshi mol qarajat ekenin, sondyqtan olar adamdardy ońaı azǵyratynyn jetkizdi.
«Eger biz olardyń paıda tabý úlgisin buzbasaq, eldiń esirtki memleketine aınalý qaýpi bar», - dep túıindedi ol.
Aıta keteıik, Belgııa esirtki saýdasymen kúresý úshin ásker jumyldyrýdy qarastyryp otyr.