Belgııa esirtki taratýshylarymen kúreske áskerı qyzmetshilerdi tartpaq

ASTANA.KAZINFORM - Belgııa ishki ister mınıstri Bernard Kventın Brıýsseldegi esirtki bıznesimen kúresý úshin áskerı qyzmetkerlerdi paıdalanýǵa shaqyrdy, dep habarlaıdy Kazinform tilshisi.

- Men áriptesim, qorǵanys mınıstri Teo Frankenmen (flamandtyq ultshyl / N-VA) muny qalaı tezirek júzege asyrýǵa bolatynyn talqylaý úshin sóılestim, - dedi Bernar Kventın.

Aıta keteıik, ótken aptada Eýropa astanasynda úsh kún ishinde tórt atys bolyp, nátıjesinde bir adam qaza taýyp, ekinshisi jaraqat alǵan bolatyn. Onyń ústine Brıýsseldegi stantsııalardyń birinde Kalashnıkov avtomatyn ustaǵan adamdardyń sýreti ǵalamtorda tarady.

- Brıýsselde qylmystyq toptar arasynda esirtki úshin soǵys júrip jatyr, - dedi Brıýssel prokýrory Jıýlen Moınıl.

Onyń aıtýynsha, Anderlehttegi atys esirtki satýshylar arasyndaǵy máselelerdi sheshýmen baılanysty bolǵan.

Belgııanyń jańa ishki ister mınıstri Bernar Kventın ótken aptada Brıýsselde bolǵan oqıǵany «shekten shyqqandyq» dep atady.

Sol sebepti ol atom elektrstantsııasy, elshilik sııaqty nysandardy baqylaýǵa áskerı kúterdi tartý kerektigin aıtty.

Óz kezeginde bul shara osy jumystan bosaǵan polıtsııa qyzmetkerlerin kóshelerdegi tártipti qadaǵalaýǵa jiberýge múmkindik týdyratynyn aıtty.

- Men muny tezirek júzege asyrý úshin áriptesim Teo Frankenmen sóılestim. Qazir ol bul máseleni qaraý úshin ákimshiligimen keńesip jatyr, -dep atap ótti ІІM basshysy.

Mınıstrdiń keńsesi koalıtsııalyq kelisimge silteme jasaı otyryp, áskerdi atom elektr stantsııalary men elshilikterdegi statsıonarlyq baqylaý úshin paıdalanylýy múmkin ekenin aıtty.

Alaıda Belgııanyń áskerı kásipodaqtary bul bastamany quptamady.

- Bul bizdiń jumysymyz emes. Oqıǵa bolǵan saıyn Qorǵanys mınıstrligin shaqyra salý ońaı, - dedi kásipodaq ókili Iv ıÝvart.

Onyń ústine, mundaı áreketterdiń zańdy negizi joq jáne áskerılerde polıtsııa ókilettigi joq, dep qosady lıberaldy qorǵanys kásipodaq uıymynyń ókili Krıs Haıbreht.

Qorǵanys mınıstri Teo Frankenniń aıtýynsha, qazirgi ýaqytta áskerı qyzmetkerlerdiń polıtsııa qyzmetin atqarýy úshin zańdy negiz joq.

Franken mınıstr Kvıntenmen polıtsııanyń tapsyrmalaryn oryndaýǵa daıyn áskerı rezervtik kúshterdi qurý jáne ornalastyrý týraly sóıleskenin rastaıdy, biraq áriptesiniń kútkenin qoldamaıtynyn bildirdi.

- Bul erteń bola salatyn másele emes. Men muny áriptesime de aıttym, - dedi ol.

Osyǵan deıin Belgııa bir ret qoldanylatyn elektrondy temekilerdi satýǵa tyıym salatyny týraly jazdyq.