Belgııa esirtki saýdasymen kúresý úshin ásker jumyldyrýdy qarastyryp otyr

ASTANA. KAZINFORM – Belgııanyń Qaýipsizdik jáne ishki ister mınıstri Bernard Kventın Brıýssel kóshelerinde esirtki tasymalynyń kúsheıýimen kúresý úshin ásker jumyldyrý múmkindigin joqqa shyǵarmaıdy, dep habarlaıdy Kazinform menshikti tilshisi. 

Bul jospar júzege asýǵa jaqyn, dep jazdy eýropalyq BAQ. 

— Ásker aýmaqtyń tutastyǵyn qorǵaýy kerek. Ádette sarbazdar muny bizdiń shekarada nemese olardan tys jerlerde jasaıdy. Biraq esirtki qylmysyna qarsy kúres te bizdiń aýmaqty qorǵaýdyń bir bóligi, — dep málimdedi B.Kventın. 

Belgııa astanasy esirtkige baılanysty atys tolqynyna tap boldy. Ótken aıda Brıýssel prokýrory Jıýlen Mýanıl zorlyq-zombylyqtyń kúsheıýin aıyptap, bıylǵy jyly 57 atysty sanady, onyń 20-sy jazda bolǵan.

B.Kventın De Standaard gazetine jańa josparǵa sáıkes sarbazdar polıtsııamen birge patrýldik qyzmet atqaryp, aralas toptarda áreket etetinin baıandady. Olardyń operatsııalary metro stantsııalary men Brıýsseldiń ońtústik-batysyndaǵy Anderleht kommýnasyndaǵy Peterbos sııaqty belgili bir aýdandardyń aınalasynda shoǵyrlanatyn bolady. 

Sarbazdardy ornalastyrý týraly saıası sheshim qazirdiń ózinde qabyldandy, biraq onyń egjeı-tegjeılerin áli kelisý kerek, dedi Kventın. Ol sheshimniń tezirek oryndalýyn talap etip otyr.

Belgııanyń qorǵanys mınıstri Teo Franken senbide áskerlerdi kóshelerge jiberýdiń zańnamalyq bazasy daıyn ekenin jáne joba jaqyn arada Mınıstrler keńesine jiberiletinin rastady. 

— Bizdiń astanamyz Brıýssel — qaýipsizdik apaty. Biz baqylaýdy qaıtarýymyz kerek, — dep jazdy Franken.

Kentenniń usynysy — keńirek «iri qalalar» josparynyń bóligi, oǵan basqa sharalarmen qatar beınebaqylaýdy arttyrý kirip otyr. Brıýssel aımaǵynan basqa jospar Antverpen, Gent, Lej, Sharlerýa jáne Mons qalalaryn da qamtıdy.

Bıliktiń Brıýsseldegi esirtki qylmysymen kúresý áreketteri eldiń bas qalasyndaǵy uzaqqa sozylǵan saıası dármensizdigine baılanysty boldy, óıtkeni Brıýssel aımaǵy 2024 jylǵy maýsymdaǵy saılaýdan keıin úkimetti osy ýaqytqa deıin qura almady.

Buǵan deıin Qazaqstan quramasymen ótken oıyn jaıly belgııalyq fýtbolshylar pikir bildirgenin jazǵan bolatynbyz.