Belgııa BUU Bas Assambleıasynda Palestınany resmı túrde moıyndaıdy

ASTANA. KAZINFORM — Belgııa úkimeti BUU Bas Assambleıasy barysynda Palestınany resmı túrde moıyndaıdy jáne Izraıl úkimetine qatysty qatań sanktsııalar engizedi. Bul týraly eldiń Syrtqy ister mınıstri Maksım Prevo X áleýmettik jelisinde habarlady. 

Belgııa Syrtqy ister mınıstrligi taratqan aqparatqa sáıkes, bul sheshim Palestınadaǵy, ásirese Gaza sektoryndaǵy gýmanıtarlyq daǵdarysqa, sondaı-aq halyqaralyq quqyqqa qaıshy keletin Izraıl áreketterine baılanysty qabyldanǵan. El bıligi mundaı qadam Izraıl halqyn emes, onyń úkimetin qysymǵa alýǵa baǵyttalǵanyn atap ótti.

Ulttyq deńgeıde 12 túrli sanktsııa engiziledi:
zańsyz qonystardan ónim ımporttaýǵa tyıym salý;
Izraıldik kompanııalarmen memlekettik satyp alý saıasatyn qaıta qaraý;
zańsyz qonystarda turatyn Belgııa azamattaryna konsýldyq kómekti shekteý;
áýe keńistiginen ushý men tranzıtke shekteý qoıý;
eki ızraıldik mınıstrdi, birneshe qonystanýshyny jáne «HAMAS» basshylaryn «persona non grata» tizimine engizý jáne basqalar.

Sonymen qatar, Belgııa EO deńgeıinde Izraılmen yntymaqtastyqty ýaqytsha toqtatýǵa, onyń ishinde EO-Izraıl assotsıatsııa kelisimin, ǵylymı-zertteý jáne tehnıkalyq baǵdarlamalardy toqtata turýǵa qoldaý bildiredi.

El sondaı-aq Frantsııa men Saýd Arabııasy bastamasymen Palestınany moıyndaý jónindegi birlesken qadamǵa qosylady.

— Bul Izraıldiń qonystandyrý saıasatyna qarsy jáne eki memleket sheshimin qoldaıtyn mańyzdy saıası ári dıplomatııalyq qadam bolmaq, — delingen habarda.

Resmı málimet boıynsha, Palestınany moıyndaý jónindegi qujat Koroldiń jarlyǵymen rásimdeledi. Bul protsess «7 qazan oqıǵasynan keıingi sońǵy tutqyn bosatylǵanda jáne HAMAS Palestına aýmaǵynda basqarý júrgizýdi tolyq toqtatqanda» júzege asyrylady.

Sonymen birge, Belgııa Palestınany qalpyna keltirýge belsendi qatysatynyn jáne antısemıtızmge qarsy sharalardy kúsheıtetinin málimdedi.

Aıta keteıik, buǵan deıin Gaza sektory keminde 10 jylǵa AQSh protektoratyna berilýi múmkin ekenin jazdyq.