Belgııa 2027 jyldan bastap tranzıtpen ótetin júrgizýshilerge jol aqysyn engizedi
ASTANA. KAZINFORM – Belgııanyń úsh óńiri 2027 jyldan bastap el aýmaǵy arqyly tranzıtpen ótetin sheteldik júrgizýshilerdi qosa alǵanda, barlyq avtokólik ıelerine arnalǵan jańa jol alymyn engizýdi josparlap otyr, dep habarlaıdy Euronews.
Qazirgi ýaqytta Belgııada avtomagıstraldardy paıdalaný úshin aqy alynbaıdy. Alaıda mundaı tólem engizý máselesi birneshe jyldan beri talqylanyp keledi.
Vallonııa óńiriniń kólik mınıstri Fransýa Deskenniń aıtýynsha, el joldaryn paıdalanatyn árbir azamat olardy kútip ustaýǵa ádil úles qosýy tıis.
Jańa erejege sáıkes, 2027 jylǵy 1 mamyrdan bastap júrgizýshiler kólikterin tirkep, jol alymyn tóleýge mindetti bolady. El aýmaǵy arqyly tranzıtpen ótetinder úshin bir kúndik ruqsatnama qarastyrylǵan.
Shyǵaryndylary nóldik deńgeıdegi avtokólikter úshin jyldyq jol aqysy 90 eýro, al qorshaǵan ortany kóbirek lastaıtyn kólikter úshin 125 eýroǵa deıin belgilenedi.
Jol kameralary aqyly ruqsatnamasyz júrgen kólikterdi anyqtaǵan jaǵdaıda júrgizýshilerge 70 eýro kóleminde aıyppul salynady.
Belgııada joldar men avtomagıstraldardy kútip ustaýǵa óńirlik bılik jaýap beredi. Jınalǵan qarajat jol ınfraqurylymyn paıdalaný men jóndeýge jumsalady.
Jańa jol alymy kúshine enýi úshin bastama óńirlik bılik pen Eýropalyq organdardyń túpkilikti maquldaýynan ótýi qajet.
Bılik ókilderiniń málimdeýinshe, jańa alymnyń engizilýi belgııalyqtar úshin basqa salyqtardy tómendetý arqyly ótelmek.
Aıta ketelik Qazaqstan úshin Belgııa nesimen mańyzdy ekenin jazǵan edik.
