Belgııa 2016 jylǵy terakt qurbandaryn eske aldy

ASTANA. KAZINFORM – Belgııada Brıýsseldegi teraktilerdiń 10 jyldyǵyna oraı eske alý sharalary ótip jatyr, dep habarlaıdy Kazinform agenttiginiń EO-daǵy tilshisi.

2016 jyldyń 22 naýryzynda Zaventem áýejaıy men Maelbek metro stantsııasynda bolǵan jarylystardan 32 adam qaza taýyp, 300-den astam adam jaraqat aldy. 

Eske alý rásimderine Korol Fılıpp pen Koroleva Matılda, sondaı-aq premer-mınıstr Bart de Vever qatysty. Tańǵy saǵat 7:58-de Zaventem áýejaıynda eki jarylys bolǵan jerde bir mınýt únsizdik jarııalanyp, «Oıdaǵy ushý» músini ornatylǵan memorıaldyq baqqa gúl shoqtary qoıyldy. Keıin Maelbek metro stantsııasynda saǵat 9:11-de bolǵan úshinshi jarylystyń qurbandaryn eske alý sharasy ótti.

Eske alý baǵdarlamasy Cinquantenaire saıabaǵy janyndaǵy Rý-de-la-Loı kóshesindegi lańkestik shabýyl qurbandaryna arnalǵan eskertkishte aıaqtaldy.

Eýrokomıssııa tóraǵasy Ýrsýla fon der Leıen Brıýsselge jasalǵan shabýyl eshqashan umytylmaıtynyn jáne Belgııamen birge ekenin aıtty. 

Óz kezeginde Eýropalyq keńes tóraǵasy Antonıo Kosta Brıýsseldegi teraktiler qurbandaryn, olardyń otbasylaryn jáne zardap shekkenderdi eske alyp, terrorızm men zorlyq-zombylyqqa qarsy turý qajettigin atap ótti. 

Eske sala keteıik, buǵan deıin Belgııanyń Lej qalasyndaǵy sınagogada jarylys bolǵanyn jazǵanbyz.