Belgisiz bireýler Máskeý áýejaıyna qaýip tóndirip, bıtkoın talap etken
MÁSKEÝ. QazAqparat - Belgisiz bireýler Máskeýdegi Domodedovo áýejaıynyń basshylyǵymen baılanysqa shyǵyp, navıgatsııalyq júıege qaýip tóndirmeýdiń ornyna bıtkoındar talap etýde, dep habarlaıdy QazAqparat TASS agenttigine silteme jasap.
Agenttiktiń málimetinshe, dál qazir báz bireýler júzdegen bıtkoındardy talap etip jatqan kórinedi. Ony oryndamaǵan jaǵdaıda áýejaıdyń navıgatsııalyq júıesine zalal keltiretindikterin aıtyp, qoqan-loqqy kórsetken. Alaıda naqty somasy atalmaǵan. Belgisiz adamdar áýejaı basshylyǵymen elektrondyq hat arqyly baılanysqa shyqqan.
Áýejaıdyń baspasóz qyzmeti agenttikke málim etkendeı, anonımdik túrdegi bopsalaýlar kelip túsken jaǵdaılarda qaýipsizdikti qamtamasyz etýdiń standarttyq sharalary qarastyrylǵan.
«Bul - aıtarlyqtaı erekshe jaǵdaı emes. Áýejaıdyń jumysyna esh qaýip tónip turǵan joq», - dedi baspasóz qyzmetindeliler.
