Belgisiz bireýler Kıýrasao aralyndaǵy balyqshylar kemesinen quny 11,5 mln. dollar turatyn 70 altyn quımasyn urlap ketti
ASTANA. 3 jeltoqsan. QazAqparat - Polıtseıshe kıingen belgisiz bireýler Karıb teńizindegi Kıýrasao araly jaǵalaýyndaǵy balyqshylar kemesinen quny 11,5 mln. dollar turatyn 70-ke tarta altyn quımasyn urlap ketti, dep habarlady ITAR-TASS jergilikti quqyq qorǵaý organdarynyń aqparatyna silteme jasap.
Polıtsııa ókili Redjı Haggınstiń aıtýynsha, shabýylǵa keminde betperde kıgen alty adam qatysqan. Olar kapıtan men ekıpajdyń úsh múshesin baılap tastap, jalpy salmaǵy 216 kelige jýyq altyn quımalaryn tıep alyp, úsh mashınamen iz jasyrǵan. Haggıng urlanǵan altyn kimdigi ekenin jáne Kıýrasao aralyna qaıdan kelgenin aıtýdan bas tartty, degenmen ony jetkizý zańdy ekenin atap ótti.
Ekıpaj músheleriniń biri jýrnalısterge keme tórt kún buryn Gaıanadan shyǵyp, Kıýrasao aralyna juma kúni jetkenin aıtyp berdi. Onyń aıtýynsha, altyn araldaǵy kompanııalardyń birine ákelingen. Keme ekıpajynda qarý bolmaǵan.
Baǵaly júk kúzet qoıylmaǵan shhýnada nege bolǵany ázirge belgisiz. Keme kapıtany qazir polıtsııaǵa jaýap berýde.
Gaıananyń altyn óndirýshiler qaýymdastyǵynyń hatshysy Raımond Emmanýeldiń aıtýynsha, elden zańdy jolmen altyn shyǵarý ádette ushaqpen atqarylady jáne qatań qaýipsizdik sharalary alynady. Degenmen keıde salyq tóleýden boı tasalaý úshin jasyryn tasymaldaý derekteri de bar.
Kıýrasao Karıb teńiziniń ońtústiginde Venesýela jaǵalaýyna jaqyn mańda ornalasqan aral, ol jergilikti ózin ózi basqaratyn Nıderlandy Koroldiginiń quramdas bóligi. Aral tanymal týrızm ortalyǵy jáne munda offshorlyq bıznes damyǵan, onyń qyzmetin negizinen Ońtústik Afrıka kompanııalary paıdalanady.
