Belgisiz bireý Mınsk-Almaty ushaǵynda bomba bar ekenin habarlady

ALMATY. QazAqparat - Almaty áýejaıynyń elektrondy poshtasyna Mınsk-Almaty baǵytyndaǵy ushaq bortyna jarylǵysh zat qoıylǵany týraly aqparat tústi, dep habarlaıdy QazAqparat tilshisi.

Almaty halyqaralyq áýejaıy baspasóz qyzmetiniń málimetinshe, «jarylǵysh zat» týraly aqparat rastalmady.

«Áýe kemesine «bomba» qoıyldy degen aqparat túse salysymen, tótenshe jaǵdaı jospary boıynsha keshendi tekserý júrgizildi. Aqparat rastalmady. Áýejaı qalypty rejımde jumys istep tur», - dep habarlady áýejaıdyń baspasóz qyzmetinen.

Ushaqta 171 jolaýshy jáne ekıpajdyń 6 múshesi bolǵan.

Áýe kóligi Almatyǵa túnde kelip qonǵan.

Eske salaıyq, naýryz aıynyń aıaǵynda Almatyda birneshe nysanǵa bomba qoıylǵany týraly aqparat taraǵan bolatyn.

Onyń ishinde Almaty áýejaıy da bar. Saldarynan 6 reıs keıinge shegerildi.

Keıin polıtsııa aqparattyń rastalmaǵanyn, nysandardan eshqandaı bomba tabylmaǵanyn málim etti.