Belgili jýrnalıst Elibaı Jikibaev ómirden ozdy
QYZYLORDA. QazAqparat - Syr jýrnalıstıkasynda ózindik orny bar, keıingi býyn qalamgerlerge ustaz bolǵan belgili jýrnalıst Elibaı Zulharnaıuly Jikibaev 60 jasynda dúnıeden ozdy, dep habarlady QazAqparat tilshisi.
Elibaı Zulharnaıuly 1956 jyly 14 qazanda Qostanaı qalasynda dúnıege keldi. Fedorov aýdanyndaǵy Chappev kolhozynda orta mektepti 1973 jyly támamdaǵan. Osy jyly QazMÝ-diń jýrnalıstıka fakýltetine oqýǵa túsedi. Ekinshi kýrsta oqyp júrgende ásker qataryna shaqyrylyp, Amýr oblysyndaǵy Baıkal-Amýr magıstralinde azamattyq boryshyn óteıdi. Áskerden soń Qostanaı oblysy Naýryzym aýdanyndaǵy «Voshod» aýdandyq gazetinde qyzmet atqardy. Sol jyldary aýdandyq partııa komıtetinde ınstrýktor qyzmetinde bolǵanymen, keıinnen óziniń súıikti isi jýrnalıstıkaǵa oralady. 1987 jyly Arqalyqtaǵy pedagogıkalyq ınstıtýttyń fılologııa fakýltetine syrttaı oqýǵa túsedi.
Elibaı aǵa ómiriniń denin jýrnalıstıka salasyna arnady. Oblystyq radıo men aýdandyq, keıin Qostanaı jáne Torǵaı oblystyq gazetterinde jemisti eńbek etti. 1991 jyly Syr óńirine qonys aýdaryp, áriptesterimen birge «Baıqońyr» atty gazet ashyp, 1993-1995 jyldary onyń bas redaktory boldy. Ol 1995 jyly oblystyq ákimdiktiń baspasóz qyzmetinde boldy. 1998 jyly qalalyq «Novaıa Kyzylorda» gazetin, keıin ataýy ózgergen «Kontakt-K» basylymyn 2006 jylǵa deıin basqarady.
Ol 1999 jyldan «Karavan» gazetiniń Qyzylorda oblysy boıynsha menshikti tilshisi boldy. 2001 jyly oblystyń úzdik jýrnalısi atandy. 2011 jyldan ómiriniń sońyna deıin oblystyq Kyzylorda-news ınternet gazetiniń bas redaktory boldy.
Elibaı aǵa, ómirde barynsha qarapaıym edi. Jany jaısań, aınalasyndaǵy adamdarǵa qashan da meıirin tógip júretin. Kishige qamqor bolyp, bilgenin úıretýden jalyqpaıtyn. Osy qazan aıynda 60 jasqa tolǵanda Syr boıy jýrnalısteri alǵaýsyz kóńildiń aq tilekterin jaýdyryp edi. Abzal aǵa, aıaýly áriptestiń beınesi ony qurmet tutqan barlyq jannyń júreginde máńgi saqtalady.
