Belgili jýrnalıst-baspager S.Ábdiraıymuly dúnıeden ozdy
ASTANA. Qazannyń 26-sy. QazAqparat - Qazaq rýhanııaty aýyr qazaǵa ushyrady. Elimizge belgili pýblıtsıst, baspager, D.A. Qonaev atyndaǵy ýnıversıtettiń qurmetti professory, «Sanat» JShS baspasynyń dırektory Serik Ábdiraıymuly aýyr naýqastan keıin dúnıeden ozdy,
dep habarlaıdy QazAqparat.
S.Ábdiraıymuly Jambyl oblysy Talas aýdanyndaǵy Úsharal aýylynda 1943 jyly mamyrdyń 5-inde dúnıege keldi. On segiz jasynan óziniń týyp ósken jerinde qurylysshy, traktorshy bolyp alǵashqy eńbek jolyn bastady (1961-1963). Odan keıin Qazaq memlekettik ýnıversıtetiniń jýrnalıstıka fakýltetine oqýǵa túsip, ony 1968 jyly bitirip shyqty. 1965 jyldan bastap, «Lenınshil jas» (qazirgi «Jas Alash») gazetiniń kishi ádebı qyzmetkerinen bastap, óziniń eńbeksúıgishtigi men bilimdiligi arqasynda jaýapty hatshy qyzmetine deıin ósti.
Ol «Jalyn» baspasynyń mýzyka jáne óner redaktsııasynyń bas redaktory, «Óner» baspasyn uıymdastyrýshy jáne bas redaktor qyzmetterinde de kásibı sheberligin tanytty (1979-1986). 1974 jyldan bastap, búgingi kúnge deıin óziniń ushqan uıasy - Qazaqtyń Ál-Farabı atyndaǵy ulttyq ýnıversıtetiniń jýrnalıstıka fakýltetinde stýdentterge dáris berip keldi.
S. Ábdiraıymuly belgili qalamger ǵana emes, bilikti de bedeldi baspager edi. 1990 jyly qyrkúıek aıynda Ál-Farabı atyndaǵy Qazaq ulttyq ýnıversıtetiniń janynan qurylǵan «Qazaq ýnıversıteti» baspasynyń, 1993 jyly osy baspanyń negizinde qurylǵan «Sanat» baspasynyń qalyptasyp damýyna uıytqy boldy.
Qalamgerdiń «Eńbek eri Ermekov» (2000), «Sol bir surapyl kúnder» (2004), «Bes múshel belesinde» kórkem esseleri (2004), «Kúndi kólegeıleı almaısyń» (2003), «Nurǵısa», «Qazaqstandyqtar» atty shyǵarmalary jáne «Brest qaharmandary» derekti fılmderi -kópshiliktiń kóńilinen shyqqan týyndylar edi. Al onyń Dinmuhamed Qonaevpen kezdesýleri nátıjesińde dúnıege kelgen «Elý jyl el aǵasy», «Lıchnost» atty eńbekteri, «Samǵaý» esseler jınaǵy búgingi jáne keleshek urpaqqa óz eliniń ótkenin bilýge yntyqtyratyn baǵaly rýhanı baılyq.
Jýrnalıst-jazýshy S.Ábdiraıymuly túrik jazýshysy Orhan Kemaldyń «Tálkekke túsken taǵdyr» romanyn, Ázız Nesın, Rasýl Ǵamzatov,Paýl Kýýsberg, Borıs Vasılev týyndylaryn tárjimelep, qyrǵyz sheshen, ýkraın, belarýs, moldavan jáne basqa ult jazýshylaryn qazaqsha sóıletti. Olar «Mansap pen mahabbat» degen atpen jeke kitap bop shyqty.
Belgili baspager, jýrnalıst-jazýshy, ulaǵatty ustaz S. Ábdiraıymulymen qoshtasý erteń, qazannyń 27-si kúni saǵat 10.00-de Almatydaǵy Jazýshylar odaǵy úıinde ótedi. Osy kúni saǵat 13.00-de Panfılovshylar saıabaǵyndaǵy «Juldyz» meıramhanasynda arnaıy asy beriledi. Al qazannyń 30-ynda Astana qalasyndaǵy «Turan» meıramhanasynda S. Ábdraıymulyna arnalyp as beriledi.
