Belgili jýrnalıst Álısultan Qulanbaı ómirden ozdy
ASTANA. QazAqparat - Belgili jýrnalıst, «Egemen Qazaqstan» gazetiniń ardageri Álısultan Qulanbaı 64 jasynda jaryq dúnıemen qoshtasty. Bul týraly QazAqparat «Egemen Qazaqstan» gazetine silteme jasap habarlaıdy.
Álısultan Muqanáliuly 1954 jyly 21 qańtarda Almaty oblysy Uıǵyr aýdany Úlkendıqan aýylynda dúnıe esigin ashqan. 1961 jyly «Oktıabr» orta mektebiniń tabaldyryǵyn attap, 1974 jyly oqýyn támamdaıdy. 1972-1974 jyldary Keńes áskeriniń qatarynda azamattyq boryshyn ótegen. Eńbek jolyn Uıǵyr aýdanyndaǵy «Oktıabr» kolhozynda kolhozshy bolyp bastaǵan. 1978-1979 jyldary Qazaq memlekettik ýnıversıtetiniń daıyndyq bóliminiń tyńdaýshysy, 1979-1984 jyldary osy oqý ornynyń jýrnalıstıka fakýltetinde bilim alǵan. 1984-1991 jyldary respýblıkalyq «Eńbek tańy» jýrnalynda korrektor, aǵa redaktor bop qyzmet atqarǵan. 1991-1995 jyldary «Aýyl» («Dala dıdary») gazetinde tilshi, sektor meńgerýshisi, bólim redaktory, jaýapty hatshy bolǵan. 1995-1996 jyldary «Qazaqstan Respýblıkasy Baǵaly qaǵazdar jónindegi ulttyq komıssııanyń jarshysy» jýrnalynda jaýapty hatshy, bas redaktor qyzmetin abyroımen atqarǵan. 1996 jyldyń 1 naýryzynan bastap osy kúnge deıin «Egemen Qazaqstan» gazetinde qyzmet istegen.
Foto: egemen.kz
