Belgili jazýshy Zeınel-Ǵabı Imanbaevtyń «Qos qaıyń» atty áńgimeler men povester jınaǵy memlekettik tapsyryspen jaryq kórdi
ASTANA. 30 qarasha. QazAqparat - Qazaqstan Respýblıkasy Baılanys jáne aqparat mınıstrligi Aqparat jáne muraǵat komıtetiniń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha Keńester Odaǵy jáne Jazýshylar Odaǵynyń múshesi Zeınel-Ǵabı Imanbaevtyń «Qos qaıyń» atty áńgimeler men povester jınaǵy «Qazaqparat» baspasynan jaryq kórdi.
Bul kitap jazýshynyń 17-inshi jınaǵy. Kitaptyń kólemi - 608 bet, 39-baspatabaq.
Ómir boıy aýyl ómirin, el tarıhyn kóp jyl boıy zerttep, shyǵarmalaryna arqaý etken jazýshy bala tárbıesine, adamgershilik taqyrybyna basa kóńil aýdarǵan qalamger.
Týǵan jerine altyn qazyq bola bilgen aýyl jazýshy týǵan tabıǵattyń tylsym tirshiligin, ańshylyqtyń syryn bir kisideı zerttep, óz eliniń tarıhyn tasqa basyp qaldyrǵan eńbekqor jan edi.
Qysqa jazýdy Anton Chehov pen Beıimbet Maılınnen úırengen Zeınel-Ǵabı Imanbaev az da bolsa tatymdy dúnıelerdi qaǵazǵa túsirýge daǵdylanǵan qalamger. Oqyrmanǵa tanymdyq, tárbıelik máni bar bul jınaq jazýshy qaıtys bolǵannan keıin 24 jyldan soń jaryq kórip otyr. Bul jınaq búginde respýblıka kólemindegi kitaphanalarǵa jetkizilip otyr.
2114 jyly jazýshy Zeınel-Ǵabı Imanbaevtyń týǵanyna 90 jyl tolmaq. Osyǵan oraı osy jınaqty qurastyryp, shyǵarý joldaryn qarastyrǵan qalamgerdiń qyzy - Qazaqstannyń eńbek sińirgen qaıratkeri, belgili radıojýrnalıst Altyn Imanbaeva taǵy da ákesiniń 3 tomdyq jınaǵyn jáne orys tiline aýdarǵan aýdarma jınaqtaryn daıyndaý ústinde.
«Ákemniń kitabyn oqyǵanda ózimen syrlasqandaı áserde bolamyn», dep syryn jasyrmaǵan Altyn Zeınel-Ǵabıqyzy ár aqyn, jazýshynyń artynda izdeýshisi bolǵanda ǵana baǵy janatynyn basa aıtady.
Óldi deýge bola ma oılańdarshy,
Ólmeıtuǵyn artyna sóz qaldyrǵan, - dep Abaı babamyz jyrlaǵandaı, artyna sóz qaldyrǵan Zeınel-Ǵabı Imanbaevtyń shyǵarmashylyǵy keler urpaqqa asyl qazyna, asyl mura.
