Belgili jazýshy Dýlat Isabekov barlyq teatrlarǵa teń dárejede qaraýǵa úndedi
Tujyrymdama jobasyn Qazaq mádenıet ǵylymı-zertteý ınstıtýty tanystyrdy. Mádenıet vıtse-mınıstri Asqar Bóribaev eń aldymen mádenıetti Qazaqstannyń ulttyq ıdeologııasyn, rýhanı damýy men álemdik keńistiktegi ornyn qalyptastyratyn qýatty qural retinde qarastyrý qajettigin atap ótti.
Al belgili jazýshy, dramatýrg Dýlat Isabekov qazirgi teatrlardyń jaı-kúıine toqtaldy. Onyń aıtýynsha, materıaldyq bazasy men qarjylandyylýy jetkiliksiz bolsa, teatr óneriniń ósip-órkendeýi qıyn. «Aýyldaǵy teatrdyń da, respýblıkalyq deńgeıdegi óner ordasynyń da múmkindikteri birdeı bolýy kerek», - dep atap ótti dramatýrg. Keleli keńeste sóz alǵan Qazaqstannyń teatr qaıratkerleriniń ardagerler keńesiniń tóraǵasy Tuńǵyshbaı Jamanqulov Mádenıet mınıstrliginiń bastamasymen usynylǵan jobany keńinen talqylaý nátıjesinde bolashaq otandyq mádenıettiń shyǵarmashylyq qaýymdastyqtaǵy jalpy kórinisi aıqyndalyp kele jatqanyn aıtty. Qazaqstandyq qoǵamnyń basty qundylyqty baǵdarlaryn qalyptastyratyn mádenı saıasat tujyrymdamasyn ázirleý mádenıet salasyndaǵy erekshe oqıǵa, dep atap ótti qatysýshylar. Shyǵarmashylyq zııaly qaýym ókilderi onyń qabyldanýy qazaqstandyq mádenıettiń álemdik qaýymdastyqtaǵy jańa qadamy bolmaq dep sanady. Aıta keteıik, QR Mádenıet mınıstrligi Elbasy N.Nazarbaevtyń «Qazaqstan joly-2050: bir maqsat, bir múdde, bir bolashaq» atty Joldaýyn júzege asyrý aıasynda mádenı saıasattyń uzaqmerzimdi tujyrymdamasyn júzege asyrýǵa kiristi. Ol úsh kezeńmen júzege asyrylady: 1 kezeń - 2015-2019 jj., ekinshisi - 2020-2030 jj., al úshinshi kezeń 2030-2050 jj. aralyǵyn qamtıdy.
