Belgili jazýshy Dıdahmet Áshimhan dúnıeden ótti
Jazýshymen qoshtasý rásimi erteń saǵat 09:30-da Almaty qalasyndaǵy Jazýshylar odaǵynyń ǵımaratynda ótedi. Dúısenbi kúni týǵan jeri Shyǵys Qazaqstan oblysy, Qatonqaraǵaı aýdanyna jerlenedi.
Dıdahmet Áshimhan 1950 jyly 10 maýsymda Shyǵys Qazaqstan oblysy, Qatonqaraǵaı aýdany, Jańaúlgi aýylynda týǵan. 1978 jyly Qazaq memlekettik ýnıversıtetiniń jýrnalıstıka fakýltetin bitirgen. Eńbek jolyn týǵan óńirindegi «Kommýnızm týy» gazetinde bastaǵan qalamger «Lenınshil jas», «Qazaq pıoneri», «Qazaq ádebıeti», «Zaman - Qazaqstan» jáne «Túrkistan» syndy gazetterde qyzmet atqardy. «Aqqabanyń tolqyny», «On birinshi kúz», «Kamennaıa pad», «Jer ańsaǵaı sary atan», «Samyrsyn sazy» jáne «Áńgime emes áńgimeler» atty birneshe áńgimeler men povester jınaǵynyń avtory. Shyǵarmalary ózbek, qyrǵyz, qytaı, mońǵol, orys, ýkraın jáne marı tilderine aýdarylǵan. Sondaı-aq, jazýshynyń ózi de ózge ulttyń belgili qalamgerleriniń eńbekterin qazaq tiline aýdardy. Jazýshynyń qaıtys bolýyna oraı áriptesteri qaıǵylaryn bildirýde. Dıdahmet aǵamen 10 jyl áriptes bolǵan «Túrkistan» gazetiniń qyzmetkeri Názııa Joıamergenqyzy Feısbýk áleýmettik jelisindegi paraqshasynda birer saǵat buryn: «Qonaqasydan keldik. Dıdaǵańnyń demi úzilipti tań ata. Eseńgiretip ketken, tosynnan jetken qaıǵyly habar... Kúni keshe ǵana jaınańdap, jaırańdap júrgen edi «Túrkistanda». «Bəri durys» degen edi densaýlyǵyn suraǵanda. Bəri durys emes eken. Ǵazız júregi kilt toqtapty abzal aǵamnyń... Sharshaǵan shyǵar, sirə... Únemi ulttyń məselesin qozǵaıtyn. Erteń "Jazýshylar odaǵynan" Altaı asady aǵam. Týǵan topyraǵyna. Qosh, Dıdaǵa. Alla aldyńyzdan jarylqasyn...», dep jazady.
