Belgili zańger Berik Bekjanovtyń jańa kitaby jaryq kórdi
QR Parlamenti Májilisiniń IV shaqyrylymynyń depýtaty bolǵan kezde Berik Aıdarbekuly Zańnama jáne sot-quqyqtyq reforma komıtetiniń múshesi bolyp, zańdardyń sapaly shyǵýyna atsalysty. Parlament qabyrǵasynda memlekettik tildiń múddesin qorǵap, kókeıkesti máseleler kóterdi. Osy sózimizdiń dálelindeı, zańgerdiń jańa kitabynda «Memlekettik qyzmetker memlekettik tildi bilsin!» atty maqalasy jarııalanyp otyr. Osy maqalasynda avtor ana tilimizdiń qoǵamdaǵy róli, qoldanys aıasyndaǵy olqylyqtardy joıý týraly aıta kelip, Elbasy Nursultan Nazarbaevtyń «Memlekettik tildiń elimizde ómir súrýshi barlyq ult ókilderin biriktirýshi til bolýy kerek» degen sózin alǵa tartqan.
Jańa jınaǵynda zańger el táýelsizdigi, memleket jáne onyń Ata Zańy, quqyqtyq saıasat tujyrymdamasy taqyryptarynda oı qozǵaıdy. Aıtalyq, kitap avtory Berik Bekjanov eldiń egemendigi týraly oılaryn bylaısha órbitken: «Táýelsizdikke ár el árqalaı jetedi. Bireý urysyp jetedi, bireýi tyrysyp jetedi. Bireýi baıbalam sap soǵysyp jetse, endi biri qyrǵıqabaq tiresip jetedi. Qalaı degende de bul joldyń ońaıy joq. Al biz bul erkindikke ózindik - qazaqstandyq jolmen keldik. Táýelsizdik - taýdaı talaptyń, kózsiz erliktiń, sanaly sheshimniń jemisi.»
Bul jınaqta qazirgi qoǵamda oryn alyp otyrǵan saıası máselelerdiń zańdyq negizderi jaıly túsinikter berilgen. Kitapqa alǵysóz jazǵan ekonomıka ǵylymdarynyń doktory, akademık Kenjeǵalı Saǵadıev: «Ultynyń ulyq qasıetterin ulyqtaı biletin, qazaqy tanym-túsinigi mol, qoǵamdyq sana men áleýmettik pikirdiń qoǵamdaǵy ornyn paraqtap, onyń saıası-quqyqtyq júıedegi úılesimin ońtaılandyrý isine eńbek sińirip júrgen azamattyń sońǵy jyldary qalam terbegen taqyryptaryn jınaqtap, kitap etip oqyrmaǵan joldaýy quptarlyq dúnıe»,- dep atap ótken.