Belgili teatr jáne kıno aktrısasy Turahan Sydyqova dúnıeden ótti

Aktrısany jerleý sharasy erteń Almaty oblysy Nura kentinde bolady.

Turahan Sydyqova Umaı ana rólin oryndaǵan kınorejısser E. Tursynovtyń «Kelin» kórkem fılmi 2009 jyly Amerıka kınoakademııasynyń «Oskar» syılyǵyna usynylyp, úzdik toǵyzdyqqa ilingen bolatyn. Osy róli úshin aktrısa QR Kınogerler Odaǵynyń «Qulager» Ulttyq kınosyılyǵyna ıe boldy.

Ol Almaty oblysy Raıymbek (burynǵy Narynqol) aýdanyndaǵy Qarasazda dúnıege kelgen.

Orta mektepti bitirgen soń Narynqol halyq teatrynda eńbek etti. S. Adambekovtyń pesasy boıynsha qoıylǵan «Kún men kóleńke» spektaklindegi Shoqbıke roli úshin respýblıkalyq baıqaýda 1 dárejeli dıplommen marapattaldy.

1966-1968 jj. M. Áýezov atyndaǵy akademııalyq drama teatr janyndaǵy stýdııany oqyp-bitirip, osy teatrǵa rejısserdiń kómekshisi qyzmetine alyndy,1970 j. akterlik quramǵa aýystyryldy.

1979-1984 jj. respýblıkalyq P .Chaıkovskıı atyndaǵy mýzyka ýchılışesiniń prıma-qobyz klasyn,1999-2002 jj. Kókshetaý gýmanıtarlyq-ekonomıkalyq ýnıversıtetiniń psıhologııa fakýltetin syrttaı oqyp bitirdi.

Úlken sahnadaǵy alǵashqy eńbegi M. Áýezovtiń «Qaragózindegi» Aqbala. Odan beri kóptegen rólderdi oryndady. Atap aıtqanda, Q. Shańǵytbaev, Q. Baıseıitovtiń «Beý, qyzdar-aı!» komedııasynda Gúlshara, N. Hıkmettiń «Farhad-Shyrynynda» Kútýshi, Sh. Aıtmatovtyń «Ana-Jer-anasynda» kórshi áıel, Uıǵyn men I. Sultanovtyń «Álisher Naýaıinde» Enaga, Q. Muqashevtiń «Jamalynda» áıel, «Partorgynda» Qatıra, Sh. Qusaıynovtyń «Aldarkósesinde» Aldarkóseniń áıeli, Ǵ. Músirepovtiń «Amangeldisinde» Zamana, Iran-Ǵaıyptyń «Shyńǵyshanynda» Ketbuǵa jyraý, A. Súleımenovtiń «Kek» drama-dıalogynda Arýaq-eles, T. Nurmaǵambetovtiń «Kempirlerden shyqqan daýynda» Muǵalıma áıel, sondaı-aq Shekspırdiń «Asaýǵa-tusaýynda» traktırshi áıel, B. Brehttiń «Toǵyshardyń toıynda» Ana obrazdaryn somdaǵan.

«Jaýjúrek myń bala», «Stalınge syılyq», «Otyrardyń kúıreýi», «Kelin», «Uljan» sııaqty kóptegen kınofılmderge tústi.