Belgili sýretshi Sabyr Mámbeev Alakól jaǵasynda oqystan kóz jumdy
ALMATY. QazAqparat - Alakól jaǵasynda belgili sýretshi Sabyr Mámbeev oqystan kóz jumdy. Qaıǵyly oqıǵa Alakól aýdany, Aqshı aýylyndaǵy «Akvamarın» demalys ornynda bolǵan, dep habarlaıdy QazAqparat tilshisi.
Demalys ornyna belgili sýretshi otbasymen kelgen.
Oqıǵany kórgenderdiń aıtýynsha, qarııa basseınde tunshyǵyp, bata bastaǵan. Osy sátte jaǵajaıdaǵylar medıtsına qyzmetkerlerin kómekke shaqyrǵan.
«Biz ol kisini alyp shyqtyq. Júregine tikeleı massaj jasap, jasandy dem bere bastadyq. Ol kisi óz-ózine kelgen kezde dáriger kelip, qan qysymyn ólsheı bastady. Demalyp jatqandardyń biri jedel járdem shaqyrdy. Birneshe mınýttan soń er adam qaıtys boldy», - dedi kýágerlerdiń biri.
Aqshı dárigerlik ambýlatorııasynyń mamandarynyń aıtýynsha, 89 jastaǵy sýretshi Sabyr Mámbeevtiń ólimi qolqanyń tarylýynan bolǵan.
Belgili keskindemeshi Sabyr Ábdirásiluly Mámbeev 1928 jyly Ońtústik Qazaqstan oblysy Saryaǵash aýdany Abaıbazar aýylynda dúnıege kelgen.
1963 jyly Qazaqstannyń eńbek sińirgen óner qaıratkeri, 1979 jyly Qazaqstan halyq sýretshisi ataǵyn alǵan. 1946 jyly Almaty kórkemsýret ýchılışesin, 1953 jyly Sankt-Peterbýrgtegi Repın atyndaǵy keskindeme, músin jáne sáýlet óneri ınstıtýtyn (A.Efımov pen A.I. Avılov sheberhanasynan) bitirgen.
