Belgili sport qaıratkeri Beket Mahmutov ómirden ótti
NUR-SULTAN. QazAqparat - 14 sáýirde Qazaqstan sportyna úlken eńbek sińirgen belgili azamat Beket Sapabekuly Mahmutov ómirden ótti, dep habarlaıdy QazAqparat Qazaqstan dzıýdo federatsııasyna silteme jasap.
Onyń esimi qazaqstandyq jankúıerlerge jaqsy tanys. Ol bokstan Qazaqstannyń eńbek sińirgen bapkeri boldy, sambodan KSRO sport sheberi ataǵyna qol jetkizdi.
B.Mahmutov 1939 jyly Almaty oblysynda dúnıege kelgen. Ómiriniń basym bóligin boks jáne dzıýdo sportynyń damýyna arnady. 1993-2000 jyldarda elimizdiń boks federatsııasyna jetekshilik etti. Bul kezeńde qazaqstandyq bylǵary qolǵap sheberleri úsh Olımpıadada turaqty túrde júldegerler qatarynan kórindi. 1996 jyly 1 altyn, 1 kúmis, 2 qola, 2000 jyly 2 altyn, 2 kúmis medal aldy. Ol 1996-2006 jyldarda Halyqaralyq boks federatsııasynda (AIBA) vıtse-prezıdent qyzmetin atqardy.
Sondaı-aq, ol 2009 jyldan bastap elimizdiń dzıýdo federatsııasyna jetekshilik jasap, ony joǵary deńgeıge kóterýge kúsh saldy.
Nátıjesinde 2009 jyly Maksım Rakov álem chempıony atandy. 2010 jyly Eldos Smetov jastar arasynda sol bıikten kórinip, keıinnen eresekter arasynda álem chempıony jáne Olımpıada júldegeri boldy.
