Belgili sazger Jalǵas Keńesov Astanaǵa án shashýyn arnady
ASTANA. QazAqparat - Kompozıtor, QR Mádenıet qaıratkeri Jalǵas Keńesov Astanaǵa án shashýyn arnady. Elorda merekesi kúnderi Astana qalasyndaǵy Ulttyq akademııalyq kitaphanada Jalǵas Keńesovtiń «Astana - ásem án qala» atty shyǵarmashylyq keshi ótti.
Aıta ketý kerek, Jalǵas Keńesov - Astanaǵa arnap 10-ǵa jýyq án jazǵan kompozıtor. Sonyń ishinde elorda turǵyndary aldynda «Astanaǵa arnaý», «Mahabbatym - Astana», «Nurly Astana», «Án shashýym - Astana», «Astana» atty ánderi shyrqaldy.
Kesh syr-suhbat túrinde ótti. Sazger kórermender suraǵyna oraı «Án erekshe sezimnen týatyny anyq. Astanaǵa qonys aýdarǵanyma alty jyldaı boldy. Astananyń kún saıyn ózgerip jatqany, qulpyra túskeni, árbir jetistigi bizderge, ásirese, óner adamdaryna oı salady. Elordaǵa arnaǵan ánderim osyndaı ishki sezimderimnen týdy»,- dedi. Aıtalyq, belgili ánshi Dosymjan Tańatarov kompozıtordyń «Astana» ánin óner keshine jınalǵandarǵa tartý etti.
Sonymen qatar osy keshte Nurlan Ónerbaevtyń oryndaýynda kórermen qaýymǵa keń tanylyp ketken «Qaıran, dúnıe» ánin jas ánshi Juldyzbek Óteshqalıev tyńdarmandar nazaryna usyndy. Bul ánniń shyǵý tarıhy týraly avtor ózi áńgimelep berdi. Mańǵystaýda qyzmet jasap júrgen kezinde, syrqattanyp júrip, osy ándi jazǵanyn, ony Nurlan Ónerbaevqa berip jibergenin, bir-eki aptadan soń, belgili ánshi bul týyndyny alǵash ret teledıdarda oryndap, halyqqa jetkizgegin aıtty. «Qaıran, dúnıe» ániniń sózin de, sazyn da ózi jazǵan.
Sondaı-aq aqyn Zákarııa Sısenǵalıevtiń sózine jazylǵan «Sen men úshin jaraldyń» ánin «Aq ájeler» ansambliniń múshesi Rahıma Nurtaıqyzy shyrqap, ónersúıer qaýymnyń qoshemetine bólendi.
Jastarǵa tárbıe berý týraly oı qozǵaǵan kompozıtor: «Óner jolynda júrgenime 30 jyldaı boldy. Qyzylorda, Ońtústik Qazaqstan jáne Mańǵystaý oblystarynda mádenıet salasynda qyzmet istedim. Ár oblysta da shákirtter tárbıeleýge mán berdim. Ustaz bolǵan soń, shákirt tárbıeleý - mindetimiz. Qazir Astana qalasynda da óner jolyna baýlyp júrgen jas shákirtterim bar»,- dedi.
Osy keshte kesh avtorynyń birneshe shákirti óner kórsetti. Sonyń biri - elordalyq búldirshin ánshi Gaýhar Baıalıeva «Dombyra» ánin oryndady.
Sonymen birge án keshinde Zarına Maqashova, Murat Qońyrbaı, Baıǵalı Mombekov, Aýǵanbaı Tóleýbaı, Dıana Maı sııaqty ánshiler kompozıtordyń ánderin oryndady.
