Belgili sarapshy Nurlan Rahymbaev teńgeniń aldaǵy baǵamy jónindegi boljamyn aıtty
ASTANA. QazAqparat - Búgin, 26 shilde kúni Qazaqstan qor bırjasynda (KASE) AQSh dollarynyń ortasha saralanǵan baǵamy 347,86 teńgeni qurady. Al, Astanadaǵy aıyrbastaý pýnkterinde bir dollardyń quny 351 teńgege deıin jetken.
Barlyq aqsha aıyrbastaý pýnkteri jınaqtalǵan kýrs.kz saıtynan qarasaq, Astana qalasyndaǵy aıyrbastaý pýnkteri sońǵy bir saǵattyń ishinde dollar qunyn 348-349 teńgeden, 351 teńgege deıin kótergen. Túski 13.30-daǵy jaǵdaı boıynsha, qalada bir ǵana aıyrbastaý pýnkti dollardy 348 teńgemen satýda. Satyp alý quny - 347-349 teńge aralyǵynda.
«Kazkommertsbank»-tiń elordadaǵy bólimsheleri tańerteń bir dollardan 348 teńgeden satsa, tús aýmaı jatyp, dollar baǵasyn 352 teńgege jetkizip otyr. «Halyq bank» dollardyń baǵasyn 348 teńgeden, 351 teńgege , «Tsesnabank» Ulttyq bank usynǵan baǵamdy ózgertpeı, dollardy 343 teńgeden satyp otyr. Ulttyq banktiń 27 shildege arnalǵan teńgeniń kýrsy - bir dollar úshin 343 teńge.
Baıqap otyrǵanymyzdaı, aqsha aıyrbastaý pýnkteriniń barlyǵy dollardyń teńgege shaqqan baǵasyn saǵat sanap ósirip otyr. Bul naryqtaǵy belgili sarapshy Nurlan Rahymbaevqa habarlasyp, óz boljamyn suradyq.
«Jalpy, meniń oıymsha, teńgeniń qazirgi qunsyzdanýy munaı baǵasynyń tómendeýimen baılanysty. Búgin biz Reseı rýbliniń qunsyzdanyp jatqanyn da kórip otyrmyz. Mine, sondyqtan, teńge kýrsynyń tómendep jatqanyn osy eki faktormen baılanystyrýǵa bolady. Al, endi teńge túse bere me, joq pa degenge keletin bolsaq, bir dollar úshin 350 teńge degenimiz - salmaqty kýrs. Biraq, meniń oıymsha, teńge turaqtana túsedi», - deıdi «Asyl ınvest» AQ Basqarma tóraǵasynyń orynbasary, kompanııanyń sarapshysy N.Rahymbaev.
Bul rette sarapshy teńgeniń turaqtanbaı, budan bylaı da qunsyzdana berýi múmkin degen qaýiptiń joq emes ekenin aıtyp otyr.
«Halyqqa jınaǵan aqshasyn basqa valıýtaǵa aýystyr, aýystyrma dep usynys aıtý óte qıyn. Árıne, teńge budan ary qaraı da qunsyzdana beredi degen qaýip bar. Biraq, eshkim de, men de eshqandaı kepildik bere almaımyz. Degenmen, emotsııaǵa berilip, aqshany aıyrbastamaı tura turǵan jón bolar. Teńge áli turaqtana túsýi ábden yqtımal», - deıdi sarapshy.
