Belgili reseılik maman Radıslav Gandapas Oralda dáris berdi
ORAL. QazAqparat - Búgin kóshbasshylyq boıynsha belgili reseılik maman Radıslav Gandapas Batys Qazaqstan oblystyq qazaq drama teatrynda prokýratýra, ákimdik, memlekettik organdar, kommertsııalyq emes jáne úkimettik emes uıymdar ókilderi úshin semınar-trenıng ótkizdi, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, oblys prokýrory men óńir basshysynyń bastamasymen, QR Bas prokýratýrasy janyndaǵy Quqyq qorǵaý organdary akademııasynyń qoldaýymen uıymdastyrylǵan shara barysynda 6 kitaptyń, 11 fılmniń avtory R.Gandapas kóshbasshy bolýdyń qyr-syry, sheshendik óner, ózin-ózi damytý máseleleri jóninde áńgimelep, keńes berdi. Segiz saǵatqa sozylǵan semınarǵa 300-den astam adam qatysyp, óz saýaldaryna jaýap aldy. 
Aıta keteıik, QR Bas prokýratýrasy janyndaǵy Quqyq qorǵaý organdary akademııasy men BQO arasyndaǵy yntymaqtastyq pen ózara túsinistik jónindegi memorandýmǵa sáıkes bıyl Oralda alǵash ret jergilikti polıtsııa qyzmetkerleriniń biliktiligin arttyrýǵa arnalǵan birinshi kýrs uıymdastyrylǵan bolatyn. Atalmysh shara - sonyń jalǵasy. 
