Belgili perýlik ánshi óz kontsertin shegerip, Nıý-Iorkke Dımashty kórýge ushyp keldi

NЬıÝ-IORK. QazAqparat – Gremmı syılyǵynyń ıegeri, perýlik ataqty ánshi Eva Aılan Dımash Qudaıbergendi kórý úshin óz kontsertin keıinge shegerip, Nıý-Iorkke keldi, dep habarlaıdy QazAqparat dimashnews.com saıtyna silteme jasap.

Qos ánshi D. Qudaıbergenniń Nıý-Iorktegi kontserti aıasynda kezdesti. Eva Aılannyń aıtýynsha, ol Dımashtyń ánin alǵash ret ómirindegi eń qıyn kezeńderdiń birinde tyńdaǵan. Anasy qaıtys bolǵannan keıin aýyr kúızeliske ushyraǵan perýlik ánshiniń jabyrqaǵan kóńilin tipti, súıikti mýzykasy da kótere almaǵan. Osyndaı qıyn ýaqytta ol Facebook-ten Dımashtyń «S.O.S» ánin oryndaǵan vıdeosyn kózi shalǵan.

«Sol sátten bastap seniń ánińdi kún saıyn tyńdaımyn. Kúızelisten aryldym», - deıdi Dımashqa aǵynan jarylǵan Eva Aılan.

Osy aptada ataqty ánshiniń kontserti ótýi tıis bolǵan eken. Alaıda, qazaqstandyq jas talanttyń kontsertin tamashalaý úshin ony keıinge qaldyryp, Nıý-Iorkke ushyp kelgen.

Dımashqa arnaıy daıyndap ákelgen syılyǵyn tabys etken Eva Aılan Perýde de qazaq ánshisiniń fan klýby óte belsendigi ekendigin aıtady. Olar D. Qudaıbergenniń ánderiniń mán-maǵynasyn túsiný úshin óz tilderine aýdaryp, shyǵarmashylyǵynyń tanymaldyǵyn arttyrýda belsendi jumystar júrgizip jatyr eken.

Dımashtyń anasy Svetlana Aıtbaeva da Eva Aılanǵa arnaıy syılyq tabystap, ulynyń shyǵarmashylyǵyna degen shynaıy súıispenshiligi úshin rızashylyǵyn bildirdi.

Eske salaıyq, D.Qudaıbergenniń 10 jeltoqsanda Nıý-Iorkte ótken jeke kontsertine álemniń 51 elinen jankúıerler jınaldy. Olar ánshini Djon Kennedı atyndaǵy halyqaralyq áýejaıdan Qazaqstannyń Týymen qarsy alǵan bolatyn.