Belgili koých-motıvator elimizde Analar mektebin qalyptastyrýdy usyndy
«Kópbalaly analar eshkimge masyl bolǵysy kelmeıdi. Óz kásibin ashyp, órbitip, egemen eldiń azamattaryn tárbıeleýdi qalaıdy.
Memleket tarapynan analar úshin barlyq múmkindikter jasalǵan. «Baqytty otbasy», «Januıa», «Analar úıi» sııaqty baǵdarlamalar oblystar men qalalarda iske asyrylýda.
Degenmen, qoǵamda analarǵa ulttyq rýhanı tárbıe berý qajettiligi bar. Sebebi, Ana - ulttyń uıaty. Bizge Analar mektebin qalyptastyrý qajet.
Taraz qalasynda jaqynda ashylǵan «Anaǵa taǵzym» rýhanı tárbıe ortalyǵy osy maqsatty tolyǵymen qamtyp otyr», - dedi ol.
Onyń málimeti boıynsha, búginde elimizde 33 óńirlik otbasyn qoldaý ortalyǵy jumys isteıdi.
«Biz osy ortalyqtardyń bazasynda «Mádenıetti ana – mádenıetti ult» jobasyn iske asyrýdy usynamyz.
Joba aıasynda analar keńesteri analarǵa ana tilin úıretýdi, elge tanymal analarymyzdy qazaqtyń «tórkindeý» rásimi arqyly jastarǵa nasıhattaýdy, otbasy shańyraqtaryn shaıqaltpaý úshin kelin bolýdy, ene bolýdy, balany rýhanı tárbıeleýge keńes berýdi qolǵa alady.
Osy oraıda barlyq óńirlerge Tarazdyń tájirıbesin taratýdy jáne «Mádenıetti ana – mádenıetti ult» jobasyn iske asyrýǵa ákimdikter tarapynan qoldaý kórsetýińizdi suraımyn», - dedi Altyn Kanıkar.
Memleket basshysy Qasym-Jomart Toqaev bul baǵyttaǵy bastamany qoldaıtynyn aıtty.
«Shyn máninde, kópbalaly ana bolý – baqyt. Memleket jáne búkil qoǵam kóp balaly analarǵa járdem berý kerek. Bul jumys úılesimdi bolýy qajet. Memleket jáne analar arasynda ózara senim, ózara jaýapkershilik bolýy kerek. Jumysyńyzdy men qoldaımyn. Bul jumys qoǵamymyzǵa óte qajet. Jalpy oblystarda osyndaı ortalyqtar neǵurlym kóp bolsa, soǵurlym jaqsy bolady. Sondyqtan sizge sáttilik tileımin», - dedi Prezıdent.
