Belgili kommentator Jandos Smaılov jańa qyzmetke taǵaıyndaldy
ASTANA. QazAqparat - Jambyl oblysy ákimdigi Іshki saıasat basqarmasynyń «Óńirlik kommýnıkatsııalar qyzmeti» KMM-niń basshysy bolyp belgili jýrnalıst, kommentator Smaılov Jandos Meıirbekuly taǵaıyndaldy, dep habarlaıdy QazAqparat tilshisi.
Bul týraly Berik Ýálı óziniń Feısbýktegi paraqshasynda jazdy.
«J.Smaılov ál-Farabı atyndaǵy Qazaq ulttyq ýnıversıtetiniń fılologııa fakýltetin támamdaǵan.
Eńbek jolyn «Almaty aqshamy» gazetinde tilshi bolyp bastaǵan, sondaı-aq, ár jyldary «Qazkontent» AQ-da respýblıkalyq Baq.kz aqparattyq portalynda jáne El.kz jastar saıtynda redaktor, «Nur Otan» partııasy Ortalyq apparatynyń Aqparattyq-monıtorıng bóliminiń basshysy, «Respýblıkalyq ǵaryshtyq baılanys ortalyǵy» AQ Qoǵammen baılanys bóliminiń baspasóz hatshysy jáne «Qazaqstandyq ındýstrııa damytý ınstıtýty» AQ-da bas sarapshy bolyp qyzmet atqardy.
2015 jyly «Aqparat salasynyń úzdigi» tósbelgisimen marapattalǵan», dep jazdy ol.
