Belgili qoǵam qaıratkeri, qalamger-ǵalym Aqseleý Seıdimbektiń turǵan úıine eskertkish taqta ornatyldy
ASTANA. Qazannyń 24-i. QazAqparat /Gúlmıra Álıakparova/ - Búgin Astanada halqymyzdyń kórnekti qalamgeri, QR Memlekettik syılyǵynyń laýreaty,
«Qurmet» ordeniniń ıegeri, professor-ǵalym Aqseleý Seıdimbekke arnap ornatylǵan memorıaldyq taqtanyń ashylý saltanaty boldy, dep habarlaıdy QazAqparat.
Memorıaldyq taqta Alashtyń aıbyndy azamaty ómiriniń sońǵy jyldary turyp, aqtyq saparǵa attanǵan Kúmisbekov kóshesindegi 6-shy úıge ornatyldy.
Sharaǵa QR Parlamenti men Astana qalalyq máslıhatynyń depýtattary, elorda basshylyǵy, Qazaqstannyń óner, mádenıet jáne qoǵam qaıratkerleri, sondaı-aq A.Seıdimbektiń ómirdegi dostary, áriptesteri jáne týǵan-týystary qatysty.
«Aqseleýsiz qyryq kún ótti. Aqań qaı baǵytqa izin salsa da, óziniń ereksheligimen, utqyr oılarymen, bıik parasattylyǵymen aıryqsha kózge túsetin. Jan-jaqty, qarymdy qalamger bolatyn. Onyń sonaý jyldary jazylǵan áńgime, povesterinen bastap, ádebıet, mádenıet, óner, tarıh týraly tereń zertteýleri, halyqtyń taǵdyryna qatysty áleýmettik-qoǵamdyq máseleler tóńireginde jazǵan pýblıtsıstıkalyq tolǵaýlary, ásirese, sońǵy jazǵan «Qazaqtyń aýyzsha tarıhy» atty kólemdi monografııasy - ulttyq sanaǵa ıgi yqpalyn tıgizetin, qazaqtyń rýhanııatyna qosylǵan altyn qazyna dep aıta alamyz. Aqseleý sondaı-aq syrbaz kúıshi bolatyn. Al onyń shyǵarǵan ánderi halyqqa keńinen tarap, eń iri sahnalarda oryndalyp júrgenin jaqsy bilemiz», dedi óz sózinde A.Seıdimbektiń ómirdegi úzeńgiles dosy Tólen Ábdik.
Eskertkish taqtany saltanatty túrde belgili jazýshy, qoǵam qaıratkeri Ákim Tarazı, QR Memlekettik syılyǵynyń ıegeri Qoıshyǵara Salǵara jáne asyl azamattyń perzenti Ernar Seıdimbek ashty.
