Belgili kınotanýshy Baýyrjan Nógerbek ómirden ozdy
ASTANA. QazAqparat - Qazaq kıno óneri aýyr qaıǵyǵa dýshar boldy. Búgin Qazaqstannyń eńbek sińirgen qaıratkeri, kınotanýshy Baýyrjan Nógerbek 70-ke qaraǵan shaǵynda dúnıe saldy.
Baýyrjan Ramazanuly Nógerbek 1948 jyly 6 tamyzda Qaraǵandy oblysy Ulytaý aýdany Ulytaý aýylynda dúnıege kelgen. 1989 jyly ónertaný ǵylymynyń kandıdaty, 1999 jyly Qazaqstannyń eńbek sińirgen qaıratkeri ataǵyn aldy. 1971 jyly Máskeý qalasyndaǵy Memlekettik kınematografııa ınstıtýtynyń kınotaný fakýltetin professor N.P.Týmanovanyń jetekshiligimen támamdaǵan.
1981-1985 jyldary Qazaqstan Kınematografııashylar odaǵy basqarmasynyń hatshysy bolǵan. 1993 jyldan qazirgi Qazaq ulttyq óner akademııasynda qyzmet etip, 2001 jyldan bastap kafedra meńgerýshisi qyzmetin atqarǵan. Ol qazaq mýltıplıkatsııalyq kıno salasyn («Ertegilerge til bitkende». Qazaqstannyń mýltıplıkatsııalyq kınosy, 1984), sondaı-aq kıno óneriniń kókeıkesti máselelerin («Qazaqstan kınosy», 1998) zertteýmen shuǵyldandy.
Ǵumyrynyń kóp bóligin óner salasyna arnaǵan qaıratker el jadynda máńgi qalatyny anyq.
