Belgili qazaqstandyq tulǵalar Nıtstsadaǵy lańkestik jaıly: Álemde úndestik zańy buzyldy
ALMATY. QazAqparat- Qazaqstannyń belgili memleket jáne qoǵam qaıratkerleri 14 shildede Frantsııanyń Nıtstsa qalasynda bolǵan lańkestik oqıǵaǵa qatysty óz pikirlerin bildirdi.
«Terrorızm «qaterli isikke» aınaldy. Bul indetti búkil álem bolyp joıýymyz kerek. Ókinishti. Biz osylaısha Allanyń qaharyna ushyraımyz», - dedi ánshi Nurlan Abdýllın.
Qoǵam qaıratkeri Arýjan Saıyn lańkestik oqıǵany álemde rýhanı jarasymdylyqtyń, úndestiktiń buzylǵandyǵymen baılanystyrady.
«Menińshe, álemde úndestik zańy buzylyp jatyr. Adamdar bir-birin estigisi kelmeıdi. Ózderiniń durystyǵyn osyndaı qanquıly árekettermen dáleldegisi keledi. Lańkesterdiń óz maqsattary, uıymdastyrýshylary bar. Sol uıymdastyrýshylar ómirde óz ornyn tappaǵan, saýaty tómen adamdardy aınalasyna jınaıdy.
Olar resýrs úshin soǵysyp jatyr. Menińshe, lańkestik, adamdardy kepildikke alýdyń, qorqytyp-úrkitýdiń bir formasy», - dedi A. Saıyn.
Sonymen qatar, ol qoǵamdy birigýge shaqyrdy.
«Menińshe álemdi, jer sharyn, adamzatty qutqarý ıdeıasynan artyq biriktirýshi ıdeıa joq. Adam balasy kóp kúnáǵa batyp jatyr, qazir. Qazir álemde bolyp jatqan jaǵymsyz, qaıǵyly oqıǵalar jer ananyń bizge jasap jatqan qahary ma dep oılaımyn», - dedi A. Saıyn.
Rejısser Ermek Tursynov óz oıyn qysqasha jetkizdi:
«Jalań sózdermen jaýap bergim kelmeıdi. Túsinikti ǵoı: bul jaqsylyqa aparmaıdy».
Esterińizge sala ketelik, 14 shilde kúni Frantsııanyń Nıtstsa qalasynda memlekettik mereke - Bastılııa qamalyn alý kúni qurmetine oraı uıymdasyrylǵan saltanatty sharadan keıin aýyr júk kóligin basqarǵan júrgizýshi merekege jınalǵan adamdardy basyp óltirdi. Oqıǵa saldarynan 80-nen astam adam qaza taýyp, 100-den asa adam jaralandy.
