Belgili qazaqstandyq arheolog Sáıden Joldasbaev ómirden ótti

NUR-SULTAN. QazAqparat – 85 jasqa tolǵan shaǵynda tanymal qazaqstandyq arheolog, tarıh ǵylymdarynyń doktory Sáıden Joldasbaev ómirden ozdy, dep habarlaıdy QazAqparat.

Bul týraly Sh.Ýálıhanov atyndaǵy tarıh jáne etnologııa ınstıtýtynan habarlandy.

Sáıden Joldasbaev tarıh ǵylymdarynyń doktory, professor, Qoja Ahmet ıAsaýı atyndaǵy halyqaralyq qazaq-túrik ýnıversıtetiniń kafedra meńgerýshisi boldy.

Almaty oblysy Uıǵyr aýdanynda týǵan. Qazaq memlekettik ýnıversıtetin, Qazaqstannyń Ulttyq ǵylym akademııasynyń Tarıh, arheologııa jáne etnografııa ınstıtýtynyń aspırantýrasyn bitirgen.

Abaı atyndaǵy Qazaq ulttyq pedagogıkalyq ýnıversıtetinde jáne ál-Farabı atyndaǵy Qazaq Ulttyq ýnıversıtetinde dáris bergen.

Ǵylymı eńbekteriniń basty baǵyty qazaq halqynyń XV-XVIII ǵasyrlardaǵy mádenıetin, Jetisý tarıhyn, paleoetnografııalyq erekshelikterdi zertteýmen baılanysty.