Belgili qazaq fılology, akademık Shora Sarybaev ómirden ozdy

Bul týraly marqumnyń týystary men áriptesteri áleýmettik jelide habarlady.

«Bar ǵumyryn ana tili ǵylymyna arnaǵan Shora Shamǵalıuly 60 jyldaı A.Baıtursynov atyndaǵy Til bilimi Instıtýtynda eńbek etip, ondaǵan ǵylym doktory men kandıdattaryn tárbıelep, artynda otyz tomnan astam fýndamentaldyq eńbek qaldyrdy. Avtordyń qazaq tili grammatıkasy, leksıka, leksıkografııa, dıalektologııa, til bilimi tarıhy men esimnamany qamtıtyn «Qazaq til bilimi máseleleri» monografııasy ana tilimizdiń hrestomatııasyna aınaldy. Sońǵy demi taýsylǵansha qolynan qalamy túspegen Sh.Sh Sarybaıdyń eńbekteri ózbek, arab, qyrǵyz, tatar, túrik, ázerbaıjan t.b. tilderge aýdarylyp, túrki tilderiniń damýyna da eleýli úles qosty», - dep jazdy Halyqaralyq adam kapıtaly ınstıtýtynyń basshysy Januzaq Ákim Feısbýktegi paraqshasyna.

Shora Shamǵalıuly Sarybaev 1925 jyly 2 naýryzda Tashkent qalasynda dúnıege kelgen. Til bilimi mamany, fılologııa ǵylymı doktory (1974 j.), professor. (1979 j.),  QR UǴA korrespondent múshesi, (1983 j.), Qazaqstannyń eńbek sińirgen ǵylym qaıratkeri (1985). Onyń ǵylymı zertteý eńbekteri dıalektologııa, morfologııa, leksıkologııa, leksıkografııa, bıblıografııa, til tarıhy, aýdarma, esimnama, altaıstıka máselelerine arnalǵan. 250-den astam ǵylymı maqalalary men oqýlyqtary, monografııalary jaryq kórgen. S.Amanjolovtyń tildegi dıalektilerdi toptaý teorııasyn ári qaraı damytyp, dıalektologııa salasyndaǵy termınderdiń qalyptasýyna atsalysqan. "Qazaq tiliniń qysqasha etımologııalyq sózdigin" (1966), "Qazaq tiliniń dıalektologııalyq sózdigin" (1969), "Jańa ataýlar sózdigin" (1992) qurastyrýǵa qatysqan.

1965 jyly AQSh-taǵy Garvard korporatsııasynyń músheligine saılanǵan, GFR-da (1975), Túrkııada (1994) ótken halyqaralyq kongress, konferentsııalarda baıandamalar jasaǵan.

Marqummen qoshtasý rásimi 3 mamyr kúni saǵat 10.00-de Almatydaǵy Ǵylym Akademııasy ǵımaratynda (Qurmanǵazy kóshesi, 29-úı) ótedi.