Belgili qalamger Nurǵoja Orazdyń úsh kitabynyń tanystyrylymy bolyp ótti
ASTANA. 27 jeltoqsan. QazAqparat - Astana qalasyndaǵy Ulttyq akademııalyq kitaphanada belgili aqyn, jazýshy, Qazaqstannyń eńbek sińirgen qaıratkeri Nurǵoja Orazdyń «Álem qaıda barady?», «Ómirdiń ózi sóıleıdi» jáne «Úsh taǵan» atty úsh kitabynyń tanystyrylymy bolyp ótti.
Halyq jazýshysy, aqyn Kákimbek Salyqov, jazýshylar Dúkenbaı Dosjan, Qoıshyǵara Salǵarauly, Qazaqstan Jazýshylar odaǵynyń múshesi, aqyn Erǵoja Tilepberdıev, zań ǵylymdarynyń doktory Qabdesh Ydyrysov jáne basqa da qalamgerler men ǵalymdar aqyn Nurǵoja Orazdyń jańa kitaptary týraly oı tolǵady. Aıta ketý kerek, jazýshynyń «Álem qaıda barady?» jáne «Ómirdiń ózi sóıleıdi» pýblıtsıstıkalyq shyǵarmalary qoǵamnyń damýy, jahandyq ózgeristerdiń yqpaly, ómirdiń kókeıkesti máseleleri jóninde syr shertedi. Qalamger óz oılaryn jaza otyryp, oqyrmandarǵa oı tastaıdy.
Al «Úsh taǵan» atty poezııalyq jyr jınaǵyna qalamgerdiń sońǵy jyldary jazǵan óleńderi men úsh poemasy engen.
Osy mádenı sharany sheber júrgize bilgen «Uly dala qyrandary» qoǵamdyq, áleýmettik-mádenı qozǵalysynyń teń tóraǵasy, jazýshy-jýrnalıst Sádibek Túgel qalamgerdiń shyǵarmashylyq jetistikteri jóninde aıtyp ótti.
Ádebı-mádenı keshte án shyrqalyp, kúı tartyldy. Jańa kitaptardyń toptamasy kitaphanaǵa tabys etildi.
Kesh sońynda aqyn Nurǵoja Oraz jınalǵan qaýymǵa rızashylyǵyn bildirip, alǵysyn jetkizdi.
