Belgili qalamger Nurǵoja Orazdyń shyǵarmashylyq keshi ótedi
ASTANA. 1 qarasha. QazAqparat - Erteń, 2 qarasha kúni Astana qalasyndaǵy Kongress-Holl saraıynda aqyn, jazýshy, Qazaqstannyń eńbek sińirgen qaıratkeri Nurǵoja Orazdyń shyǵarmashylyq keshi (saǵat 15-00) ótedi.
Keshti Qazaqstan Memlekettik syılyǵynyń laýreaty, akademık Serik Qırabaev kirispe sózben ashatyn bolady.
Fılologııa ǵylymdarynyń doktory Serik Negımov aqynnyń shyǵarmashylyq jetistikteri týraly shaǵyn baıandama jasaıdy dep kútilýde. Sondaı-aq kórnekti aqyn, qoǵam qaıratkeri Kákimbek Salyqov qalamdas áriptesine arnaǵan óleńin oqıdy.
Aqynnyń 80 jasqa tolý qurmetine arnalǵan bul shara Astana qalasy ákimdiginiń qoldaýymen uıymdastyrylyp otyr.
Ádebı keshte aqyn Nurǵoja Narymbaıuly týraly oılar ortaǵa salynyp, onyń óleńderine jazylǵan ánder shyrqalady.
Sondaı-aq Kongress-Holl saraıynda aqynnyń kitaptarynan quralǵan kórme uıymdastyrylmaq.
Qazaq poezııasynda ózindik úni bar aqyn Nurǵoja Oraz 1932 jyldyń 20 qazanynda Qostanaı oblysynyń Sarykól aýdanynda dúnıege kelgen.
Ol keńestik júıe ústemdik quryp turǵan kezeńde Saryarqa óńirinde halqymyzdyń ádebı-mádenı murasynyń qaıta jańǵyrýyna zor úles qosqan. Ana tilimizdiń mártebesin kóterý úshin aıanbaı eńbek etti. Jergilikti jas aqyn-jazýshylardyń tanylýyna, eńbekteri jaryq kórýine yqpal etken. Qalamgerlik jolynda kóptegen shákirtter tárbıelep shyǵarǵan. 1970-80 jyldary osy óńirde aqyndar aıtysyn uıymdastyrýshylardyń biri. Arqa óńiriniń qalamgerlerine qoldaý kórsetý maqsatynda 1991 jyly «Saryarqa» ádebı-qoǵamdyq jýrnalyn shyǵardy.
1964 jyly N. Orazdyń «Tuńǵysh» kitaby jaryq kórdi. Odan keıin «Shuǵyla», «Kóńil kóktemi », «Tyń túlegi», «Qyrandar uıasy», «Jaýqazyn shaq», «Dala demi» taǵy da basqa poezııalyq, prozalyq jáne pýblıtsıstıkalyq jınaqtary jarııalanǵan.
