Belgili ǵalym, tarıhshy Ábdesh Tóleýbaev ómirden ozdy
ASTANA. QazAqparat – Elimizge tanymal ǵalym, tarıh ǵylymdarynyń doktory Ábdesh Tóleýbaev ómirden ozdy, dep habarlaıdy QazAqparat.
Bul týraly óziniń Instagram paraqshasynda Danıal Ahmetov jazdy.
«Búgin meniń dosym, elimizdiń belgili ǵalymy, tarıh ǵylymdarynyń doktory, professor Ábdesh Tóleýbaev ómirden ozdy. Ábdesh Táshkenuly tájirıbeli dala zertteýshisi jáne ekspedıtsııalyq jumystardyń tamasha uıymdastyrýshysy bola bildi. Arheologııalyq eskertkishterdi anyqtaý jáne zertteý boıynsha belsendi qyzmet atqardy. Ǵylymı kitaptar men maqalalar jazyp, artynan zor mura qaltyrdy. Sońǵy 20 jylda ol Shyǵys Qazaqstannyń Tarbaǵataı, Saýyr jáne Shyńǵystaı taý bókterindegi arheologııalyq eskertkishterdi sátti zerttedi. Ábdesh Tóleýbaev álemdik deńgeıdegi jańalyqtarǵa ıelik etedi. Ol altynnan myńdaǵan erekshe artefaktilerdi – erte saq dáýirindegi ejelgi zergerlerdiń qoldanbaly ónerin jınady. Men Ábdesh Táshkenuly Tóleýbaevtyń týystary men jaqyndaryna kóńil aıtamyn. Onyń ardaqty esimi máńgilik jadymyzda saqtalady», - dep jazdy, Danıal Ahmetov.
