Belgili ǵalym, baspager Ǵ.Ánes fılologııa ǵylymdarynyń doktory ataǵyn ıelendi
ORAL. 25 aqpan. QazAqparat - Belgili ǵalym, Almatydaǵy «Arys» baspasynyń dırektory, halyqaralyq «Qazaq tili» qoǵamynyń vıtse-prezıdenti Ǵarıfolla Ánes fılologııa ǵylymdarynyń doktory ataǵyn ıelendi.
Ǵalym doktorlyq dıssertatsııasyn 2010 jyly 20 jeltoqsanda Abaı atyndaǵy Qazaq ulttyq pedagogıkalyq ýnıversıtetinde «Mátin keńistigi: semantıkalyq, etımologııalyq aspekt» degen taqyrypta qorǵaǵan bolatyn.
Ǵ.Ánes saıası qýǵyn-súrginge ushyraǵan Qazaqstan zııalylarynyń murasyn zertteıtin «Arys» qoryna jıyrma jylǵa jýyq ýaqyt boıy basshylyq etip keledi. Atalmysh qor men baspa osy merzim ishinde jazyqsyz jazalanyp, el jadynan óshe bastaǵan birtýar qaıratkerlerdiń, aqyn-jazýshylardyń, óner adamdarynyń murasyn jınastyryp, kitap etip shyǵardy. Baspadan sondaı-aq kóptegen oblys, aýdan entsıklopedııalary, ádebı shyǵarmalar, sózdikter jaryq kórdi.
