Belgili ǵalym, akademık Oraz Baımuratovtyń 75 jyldyǵyna arnalǵan halyqaralyq konferentsııa ótip jatyr
ALMATY. Qyrkúıektiń 22-si. QazAqparat /Erbol Azanbek/ - T. Rysqulov atyndaǵy Qazaq Ekonomıkalyq ýnıversıtetinde «Qazirgi álemdegi órkenıetti ózgerister jaǵdaıyndaǵy áleýmettik ekonomıka: jetilý úlgileri men damý baǵyttary» atty halyqaralyq ǵylymı - tájirıbelik konferentsııa ótip jatyr,
dep habarlaıdy QazAqparat.
Konferentsııa Qazaqstan Respýblıkasy Ulttyq ǵylym akademııasynyń akademıgi, Qarjy - bank menedjmenti ǴZI dırektory, Qazaqstannyń belgili memleket jáne qoǵam qaıratkeri, bilim berý isiniń ozaty, ǵylym isterin kórnekti uıymdastyrýshylardyń biri, iri ǵalym - ekonomıst Oraz Baımuratovtyń 75 jyldyq mereıtoıyna arnalǵan.
Halyqaralyq keleli keńestiń basty maqsaty - áleýmettik ekonomıka ilimi men tájirıbesiniń máselelerin sheshýde jaqyn ári alys shet elderdegi qoǵamdyq-gýmanıtarlyq salalar jetekshi ǵalymdaryn biriktirý jáne qoǵamdy, onyń ekonomıkasyn úılesimdi damytý joldary týraly konferentsııada aıtylǵan usynystardy qabyldaý. 200-ge jýyq alys- jaqyn shet elderdiń ekonomıst ǵalymdary, sarapshylar qatysqan konferentsııa aıasynda barlyq kontınentterdegi elderdiń áleýmettik ekonomıkasy: qoǵamnyń materıaldyq jáne rýhanı qundylyqtarynyń úılesimdi baılanys ustanymyndaǵy úlgileri, sheshiletin máseleleri, engizetin ózgerister men bolashaǵy jáne elderdiń ekologııalyq qaýipsizdigin qamtamasyz etý, Ǵalamdyq qarjy - ekonomıka daǵdarysy jaǵdaıyndaǵy áleýmettik ekonomıka, Qazirgi qoǵamnyń jáne onyń ekonomıkasynyń tyǵyz baılanysy negizinde damýynyń órkenıettilik pen áleýmettik-gýmanıtarlyq turǵysy taqyryptary talqylanýda. Sondaı-aq Ekonomıkamen, demokratııalyq jáne demografııalyq órkendeý jáne qoǵam ómirindegi rýhanı óris aralaryndaǵy úılesimsizdikten úılesimdilikke jetý arqyly - úılesimdi áleýmettik ekonomıkanyń jańa úlgisine ótý máseleri boıynsha da baıandamalar jasaldy.
