Belgili fýtbolshy úsh adamdy kólikpen qaǵyp óltirdi
ASTANA. 22 qarasha. QazAqparat - Sevastopol qalasynda belgili ýkraın fýtbolshysy Vladıslav Pıskýn avtokólikpen bir áıeldi jáne eki balany qaǵyp ketti.
RBK-Ýkraına agenttiginiń jergilikti quqyq qorǵaý organdaryna silteme jasaı otyryp habarlaýynsha, úsh adam da qaza tapty.
Qazirgi tańda Ýkraına premer-lıgasynyń "Sevastopol" fýtbol komandasy úshin óner kórsetip júrgen sportshy tutqyndalyp, Sevastopol mılıtsııa basqarmasynyń ýaqytsha qamaý ızolıatoryna jabyldy.
Saraptamanyń qorytyndylary boıynsha, jol-kólik apaty kezinde V.Pıskýn saý bolǵan, ıaǵnı maskúnemdik jaǵdaıynda bolmaǵan. "Sevastopol" komandasynyń qorǵaýshysy óziniń kinásin moıyndap, jaýap bergen. Fýtbolshynyń sózine qaraǵanda ol Mitsubishi kóligin basqaryp kele jatqan dosymen jaryspaq bolǵan.
Mitsubishi kóligi alǵa shyǵyp ketkende, BMW avtokóligindegi V.Pıskýn ony qarama-qarsy baǵyttaǵy troleıbýs jolaǵyna shyǵyp, ozyp ketpekshi bolǵan, alaıda kólikti basqara almaǵan sportshy jaıaý júrginshiler jolyna shyǵyp ketken. Fýtbolshynyń avtokóligi aldymen kóshedegi dińgekke soǵylyp, ǵımarat qabyrǵasyna qaraı soǵylǵan. Odan keıin eki jáne bes jasar balalarymen kele jatqan áıeldi qaǵyp ketken. Úsh adam da qaza tabady.
Beıresmı málimetter boıynsha, avtokólik ishinde fýtbolshynyń áıeli de bolǵan. Ol alǵan jaraqattarynan aýrýhanada kóz jumdy degen aqparat ta taraǵan.
