Belgili fýtbolshy Serik Jeılitbaevtyń ómirden ozýy elimizdiń sportsúıer qaýymynyń qabyrǵasyn qaıystyryp ketti
ASTANA. 16 qańtar. QazAqparat - QR Sport jáne dene shynyqtyrý agenttiginiń tóraǵasy Talǵat Ermegııaev belgili qazaqstandyq fýtbolshy Serik Jeılitbaevtyń týǵan-týysqandaryna kóńil aıtty.
Bul týraly QR Sport jáne dene shynyqtyrý agenttiginiń baspasóz qyzmeti habarlap otyr.
«Sportsúıer qaýym orny tolmas qazaǵa dýshar boldy. Serik Jeılitbaev qazaqstandyq fýtboldyń damýyna ólsheýsiz úles qosty. Onyń jarqyn beınesi myńdaǵan jankúıerlerdiń júreginde máńgige saqtalady», - delingen kóńil aıtý hatynda.
Sonymen qatar, aty ańyzǵa aınalǵan sportshynyń týǵan-týysqandaryna onyń dostarynan, áriptesterinen, jankúıerleri men S. Jeılitbaev ómiriniń sońǵy jyldarynda jattyqtyrýshy bolyp qyzmet etken almatylyq «Qaırat» klýbynyń ujymynan da kóńil aıtý hattary kelip tústi. «Qaırat» fýtbol klýbynyń barlyq ujymy jáne jankúıerleri Seriktiń týǵan-týysqandaryna shyn júrekten kóńil aıtady. Sen bizdiń júregimizde máńgilikke qalasyń», - delingen hatta.
Esterińizge sala keteıik, qazaqstandyq belgili fýtbolshy Serik Jeılitbaev uzaqqa sozylǵan naýqasynan aıyǵa almaı jeksenbiden dúısenbige qaraǵan túni 38 jasynda kóz jumdy. Sońǵy birneshe jylda ol mıynan qaterli isikti alǵyzý úshin 2 ret aýyr otadan ótti. Onyń alǵashqysy Sankt-Peterborda jasaldy, sodan keıin ol biraz ýaqyt ózin jaqsy sezingen. Alaıda hali nasharlaǵan soń, ekinshi ret Izraılde jasaldy. Ókinishke qaraı, ol bul qaterli aýrýdy jeńe almady.
S.Jeılitbaev qamshynyń sabyndaı ǵumyrynda «Nısa» (Ashhabad), «Sıbır» (Kýrgan), «Qaırat», «Ertis», «Jetisý», «TsSKA-Qaırat», «Esil-Bogatyr» syndy klýbtarda óner kórsetip, Qazaqstannyń úsh dúrkin chempıony atandy. Eki márte Qazaqstan Kýboginiń ıegeri boldy. Qazaqstan chempıonatynda alǵash ret almatylyq «Qaırattyń» sapynda oınady.
