Belgili bir salany damytý úshin, atalǵan salany memlekettik tilde sóıletýimiz qajet - sarapshy pikiri
ASTANA. 28 jeltoqsan. QazAqparat /Jasulan Amanbaıuly/ - Belgili bir salany damytý úshin, atalǵan salany memlekettik tilde sóıletýimiz qajet.
Búgin Astanada Memlekettik tildiń qoldanys aıasyn keńeıtýdiń ózekti máseleleri atty respýblıkalyq semınar otyrysy kezinde QR Qorshaǵan ortany qorǵaý mınıstrligi Qujat aınalymy jáne kadr jumysy departamenti Kadr jumysy jáne til saıasaty basqarmasynyń bas sarapshysy Serik Ýpıev osylaı atap kórsetti.
Atalmysh semınarda qorshaǵan ortany qorǵaý salasynda memlekettik tildi damytýdyń ádisnamalyq, ádistemelik tájirıbelik máselelerin ashý, óz qyzmet salasynda, ǵylymı turǵyda, ádistemelik máseleler kóterilgen bolatyn. Oǵan Qorshaǵan ortany qorǵaý mınıstrliginiń ókilderi, ekologııa jáne tabıǵatty qorǵaý salasynda qyzmet istep júrgen tájirıbeli mamandar, ekolog ǵalymdar, memlekettik tildegi ádistemelik jáne ádisnamalyq quraldar máseleler jónindegi sarapshylar ózderiniń pikirleri men usynystaryn ortaǵa saldy.
«Bizdiń eń birinshi máselemiz - ekologııa salasyndaǵy termınologııanyń qalyptaspaýy. Mamandardyń til biliminiń joqtyǵy. Halyqaralyq tájirıbe kórsetip otyrǵanyndaı, belgili bir salany damytý úshin, atalǵan salany memlekettik tilde sóıletýimiz qajet. Ol úshin sol baǵytta memlekettik tildegi termınologııany qalyptastyrýǵa tıispiz»,-dep atap kórsetti S. Ýpıev.
Onyń aıtýynsha, salalyq termınologııada birizdiliktiń joqtyǵy qazaq tilinde memlekettik is júrgizý, memlekettik tilde qujat aınalym salalaryna birshama qıyndyqtar keltirip otyr. Sonyń áserinen memlekettik organdar birin biri túsinbeıtin jaǵdaıǵa jetken.
«Elbasy Nursultan Nazarbaev árdaıym óz sózinde Qazaq eliniń bolashaǵy - qazaq tilinde dep aıtyp keledi. Alaıda biz qazirgi tańda ony iske asyra almaı otyrmyz»,-dep atap kórsetti ol.
Bıyl Memlekettik tildi qoldaný men damytýdyń 2011-2020 jyldarǵa arnalǵan memlekettik baǵdarlamasy qabyldandy. Soǵan oraı qatysýshylar semınar barysynda baǵdarlama aıasynda qamtylǵan memlekettik tilde is júrgizý, memlekettik organdarda qazaq tilinde is atqara alatyn mamandardy daıarlaý túıtkiline basa nazar aýdarýǵa tyrysty.
