Belgili ánshi, kásibı rejısser Záýresh Esbergenova dúnıeden ótti

Z. Esbergenova 1940 jyly 27 sáýirde Mańǵystaý oblysy Shetpe aýdanyndaǵy «Úshtaǵan» aýlynda dúnıege kelgen. Qazaqtyń Qurmanǵazy atyndaǵy ulttyq konservatorııasynyń túlegi. Respýblıkalyq estrada-tsırk stýdııasynda professor Nádııa Sháripovanyń aldynan dáris alǵan.

Eńbek jolyn Jambyl oblystyq teatrynan bastap, keıin Torǵaı, Atyraý oblystyq drama teatrynda rejısserlik ári akterlik eńbegimen ózin tanytqan daryn ıesi bala kezinen arman etken ánshilik jolǵa birjolata túsip, «Qazaqkontsert» birlestiginiń janynan qurylǵan óner tobymen Qazaqstannyń túkpir-túkpirin aralap, halyq ánderimen qosa mańǵystaýlyq kompozıtorlar - Jeti qaıqynyń ánderin tyńdaýshylaryna talmaı nasıhattaı bildi. Sondaı-aq Qazaqstan kompozıtorlarynyń tamasha ánderin tamyljyta oryndap, kópshilik kóńilinen shyqty. Ónerin- ómirim dep túsingen Záýresh Esbergenqyzy «Qazaqstan» telearnasynda rejısser jáne Qazaq radıosynda mýzyka redaktory retinde de ózin kórsete bilip, jan-jaqtylyǵymen erekshelengen jan edi. Tipti zeınetkerlik jasqa jetkennen keıin de Mańǵystaý óńirine atbasyn buryp, 2003 jyly Aqtaý qalasynda jańa ashylǵan Nurmuqan Jantórın atyndaǵy drama teatryna rejısserdiń kómekshisi bolyp ornalasyp, onshaqty jyl jemisti eńbek etti. Birneshe ret óziniń jeke shyǵarmashylyq keshin ótkizdi, saǵynysyp kórisken jerlesterine Jeti qaıqynyń ánderin oryndap, kórermen yqylasyna bólendi.

Qazaq radıosynyń «Altyn qorynda» ánshi Záýresh Esbergenovanyń óz oryndaýyndaǵy 30-ǵa jýyq ánderi men arnaıy habarlary saqtalǵan.

Záýresh Esbergenqyzy óziniń ómiri men óneri jaıly jazǵan «Ómirimniń jibek joly» jınaǵynyń avtory.

Záýresh Esbergenqyzy otbasynda úsh ul, bir qyzdy dúnıege ákelgen baqytty ana edi.