Belgili aqyn, aýdarmashy Áýbákir Nilibaev dúnıeden ozdy

Bul týraly QR Jazýshylar odaǵynyń baspasóz qyzmetinen habarlady.

1928 jyly 10 sáýirde Shyǵys Qazaqstan oblysynyń Zaısan aýdanynda, Qara Ertis ózeniniń jaǵasynda dúnıege kelgen. Zaısan pedagogıkalyq ýchılışesin, Qazaq memlekettik ýnıversıtetiniń fılologııa fakýltetin bitirgen. Jıyrmaǵa jýyq jyr jınaqtary shyqqan: «Tańǵy tynys» (1967), «Bolashaq osylaı bastalǵan» (1970), «Aqmaral» (1970), «Jyr jalaý» (1972), «Qońyr jel» (1973), «Alaýlaǵan armandar» (1974), «Kóńil kózi» (1976), «Aqqý-qazdar» (1977), «Іńkár júrek» (1978), «Kúnim meniń» (1980), «Jer júregi» (1984), «Jıhan jıhazy» (1987), «Asyl adam» (1989), «Myń sóz» (2001). «Sovetskıı pısatel» baspasynan «Zvezdy stepı» degen jyr jınaǵy shyqqan (1985). Eshıldiń «Buǵaýlanǵan Prometeıin», «Býyrqanǵan bula jyr» degen atpen shyqqan Azııa jáne Afrıka aqyndarynyń óleńderin, «Lenındi álem jyrlaıdy» atty kitapty, Pákistan aqyny Muhammad Ikbaldyń tańdamaly óleńderi men poemalaryn, E.Poteniń óleńderi men poemalaryn, M.Lermontovtyń, R.Tagordyń, orys aqyndary V.Maıakovskııdiń, N.Zablovskııdiń, M.Svetlovtyń, t.b. óleńderin aýdarǵan. 2002 jyly Úndi eposy «Mahabharata», 2004 jyly «Rıgveda», «Bhagavadgıta» atty kitaptary «Ólke» baspasynan, 2005 jyly Astanadaǵy «Aýdarma» baspasynan «Mahabharata», «Ramaıana» degen aýdarma kitaptary jaryq kórgen. 2006 jyly «Dhammapada» jáne Rabındranat Tagordyń tańdamaly shyǵarmalaryn aýdaryp bastyrǵan. 1983 jyly «Jazýshy» baspasynan onyń qurastyrýymen Mońǵolııa aqyndarynyń kitaby qazaq tilinde jaryq kórse, 1986 jyly Máskeýdegi «Sovremennık» baspasynan «Stepnoe solntse» degen atpen qazaq aqyndarynyń óleńderi orys tilinde basylyp shyqqan. Úndistan Respýblıkasynyń Padma Shrı syılyǵynyń laýreaty, Pákistan Respýblıkasynyń Ikbal Akademııasynyń «Ikbaldyń Altyn eskertkishi» syılyǵynyń ıegeri. «Jeńistiń 60 jyldyǵy», «Eren eńbegi úshin» medaldarymen marapattalǵan.