Belgili aktrısa qaza tapqan jol apaty: Jańa derekter shyqty
ALMATY. QazAqparat - Belgili aktrısa Sholpan Elgezek pen taǵy da eki adamnyń ólimine kúdikti Gelandewagen júrgizýshisiniń jol apaty bolardyń aldynda qaıda bolǵany anyqtaldy, dep habarlaıdy QazAqparat tilshisi.
Qaıǵyly oqıǵanyń jaı-japsary týraly qalalyq Polıtsııa departamenti aıtyp berdi
«Gelandewagen kóligin tizgindegen mas adamnyń Abaı kóshesinde Mıtsýbısı Galantty soǵyp, úsh adamnyń ómiriniń qıylýyna sebepker bolǵanyn bilemiz. Biraq sol júrgizýshiniń «Grand Opera» túngi klýbynda araq iship, klýbtan mas kúıinde shyqqanyn bireý bilse, bireý bilmeıdi. Túngi klýbtar men barlardyń qojaıyndary kóp jaǵdaılarda quqyq buzýshylyqtarǵa jol berip jatady», - dedi qalalyq Polıtsııa departamenti basshysynyń orynbasary Іzbasar Bekturov.
Polıtsııa ókiliniń aıtýynsha, qaladaǵy kóptegen quqyqbuzýshylyqtar kóńil kóteretin oryndardyń basshylarynyń jaýapsyzdyǵynan bolyp otyr.
Byltyrdyń ózinde túngi klýbtar men dámhanalardan polıtsııaǵa 2 myńǵa jýyq qońyraý túsken. Klýb basshylary klıentterdiń kópshiligi óz kóligimen kelgenin kóre tura, olarǵa alkogoldi ishimdik sata beredi.
«Jańa jyl túni qarsańynda «Pıonerskaıa pravda» túngi klýbynda kelýshiler ózara daý-janjal shyǵarǵan. Sonyń saldarynan klýbqa kelýshilerdiń biri aýyr jaraqat alyp, kóz jumǵan. Sonymen qatar, «Chýkotka» barynyń qasynda bolǵan tóbelesten de bir er adam mert bolǵany belgili. Oǵan qaramastan ol klýb mańynda áli de urys-tóbeles tolastar emes. Osyndaı keleńsiz oqıǵalar klýb ákimshiliginiń durys jumys jasamaýynan oryn alady»,- dedi polkovnık Bekturov.
Tártip saqshysy klýb qojaıyndarynyń kúzetshilerdi kósheden jaldaıtynyn taǵy atap ótti.
«Mekemelerdiń 50 paıyzy kúzet qyzmetin syrttan jaldaıdy. Olardyń kópshiliginiń daý-janjaldy ýshyqtyrmaı sheshýde tájirıbesi joq. Osydan 1 aı buryn «Everııa» dámhanasynda 1 boıjetken kóz jumdy. Dámhanada qaýipsizdik sharalaryn tek 1 ǵana kúzetshi qadaǵalaǵan. Bul qyzmetkerdiń lıtsenzııasy bolmaǵandyqtan, ol qajetti qaýipsizdik sharalaryn qabyldaı almady», - dedi ol.
Aıta ketý kerek, polıtsııa qaladaǵy eń krımınogendi demalys oryndarynyń tizimin jarııalaǵan bolatyn.
Buǵan deıin Almatyda jol apatynan tanymal aktrısa Sholpan Elgezek pen taǵy eki kisi kóz jumǵanyn habarlaǵan edik.
