Belgili advokat aıyppuldy rásimdeýden qoryqpaýǵa shaqyrdy
ASTANA. QazAqparat - Qazaqstandyq belgili advokat Djohar Ýtebekov Feısbýktegi paraqshasynda júrgizýshilerge aıyppuldy resmı rásimdeýden qoryqpaýǵa keńes berdi, dep habarlaıdy QazAqparat tilshisi.
«Qazaqstanda 2015 jyldan bastap jol erejelerin birneshe márte buzǵany, ıaǵnı bir jyl ishinde jol qaýipsizdigin úsh ret buzǵany úshin júrgizýshi kýáliginen aıyrý tártibi alynyp tastaldy. (Ekzotıkalyq tártip. Avarııalyq aıaldamany jasaý men temir jol ótpesiniń tártibin ekinshi ret buzý jarty jylǵa deıin júrgizýshi kýáliginen aıyrady). Bizde birneshe márte jol tártibin buzǵanǵa qatań jaza joq. Aıyppul kólemi Ákimshilik quqyq buzýshylyq týraly kodekstiń bir baby boıynsha ereje birneshe márte buzylǵan jaǵdaılarda ǵana ulǵaıady», - dep jazady advokat Feısbýktegi paraqshasynda.
Advokat mysal retindy bylaı deıdi, eger sizge jol belgisi boıynsha toqtaǵany úshin aıyppul salsa, onda onyń kólemi tek belgilenbegen orynǵa toqtaǵany úshin ǵana kóteriledi. Al qaýipsizdik belbeýi nemese far úshin aıyppul óspeıdi.
«Sondyqtan da para berip barlyǵyn sol jerde jeńil sheship alamyn dep umtylmańyz jáne resmı túrde aıyppul rásimdeýden qoryqpańyz. Siz jol tártibin qaıtalap buzǵan kezde de júrgizýshi kýáliginen aıyrylmaısyz, aıyppul kólemi de óspeıdi eger siz dál sol jol tártibin buzbasańyz», - deıdi D.Ýtebekov.
Sondaı-aq ol eger tártip buzǵanyn moıyndaý túbirtek boıynsha aıyppuldy 50% tómendetedi dep atap ótti.
