Belgilenbegen jerlerde temeki tartqan 21 myńǵa jýyq azamat jazalandy
ASTANA. QazAqparat - Jyl basynan beri kólik polıtseıleri belgilenbegen jerlerde shylym shegýdiń 20 869 faktisin tirkedi. Bul týraly Kóliktegi ІІD baspasóz qyzmetinen habarlady.
Kóliktegi ІІD qyzmetkerleri áýejaılar men temirjol vokzalynda, jolaýshylar poıyzdarynda qaıǵyly oqıǵalarǵa, qylmys pen quqyq buzýshylyqtarǵa jol bermeý maqsatynda turaqty túrde keshendi aldyn-alý sharalaryn ótkizip keledi. Turaqty júrgizilgen jumystyń nátıjesinde Kóliktegi ІІD Ákimshilik polıtsııasy basqarmasynyń qyzmetkerleri jyl basynan beri 38 106 quqyq buzýshyny ákimshilik jaýapkershilikke tartty. Onyń ishinde 1259 fakti - usaq quqyq buzýshylyq bolsa, 706 faktide ortaq paıdalaný oryndaryn lastaǵany úshin jaýapker boldy. Jalpy kólemi 47 mln. teńgeniń aıyppuly salyndy. Sondaı-aq usaq urlyq boıynsha - 328 fakti, usaq esirtki - 264, spırttik ishimdikter iship, qoǵamdyq oryndarda mas kúıinde júrý - 5855, belgilenbegen jerlerde temeki shegý boıynsha - 20 869 fakti anyqtaldy. Temirjol jáne áýe kóligi nysandarynda qańǵyp júrgen kámeletke tolmaǵan 133 jasóspirim beıimdeý ortalyǵyna jetkizilip, turǵylyqty meken-jaıy joq 439 adam qabyldap-taratý oryndaryna ornalastyryldy. Eske sala keteıik, QR ÁQBtK 330-babyna sáıkes qoǵamdyq oryndarda balaǵat sózder aıtyp, ortaq paıdalaný oryndaryn, saıabaqtardy, skverlerdi lastap, onyń ishinde belgilenbegen oryndarda kommýnaldyq qaldyqtardy shyǵarý, ıaǵnı usaq buzaqylyq jasaǵan azamattarǵa 4 myńnan 17 myń teńgege deıin aıyppul salynady nemese 10-15 táýlikke ákimshilik qamaýǵa alynady. Qoǵamdyq oryndarda ishimdik iship, mas bolǵandarǵa (330-bap) 3 myń teńge, shylym shekken azmattarǵa (336-bap,-bólim) 1,6 myńnan 8 myń teńgege deıin, sondaı-aq ózgelerdiń tynyshtyǵyn buzǵandarǵa (333-bap) 3 myńnan 8 myń teńgege deıin aıyppul salynady. Al bir jyldyń ishinde qaıtalap quqyq buzǵan jaǵdaıda 15 táýlikke qamalady.
